137.vro.txt

"Väkev leopart – tsungli valitsõja"
Tuu oll Tõnulõ kõgõ armsamb artikli.
Päälkirä peräst muidoki innekõkkõ, a jutt esi oll ka iks väega illos.
Sääl kirotõdi tuust, milleperäst tsungli õigõ valitsõja om hoobis tark ja taidsa leopart, mitte suur ja kohmats lõvi.
Tõnu esi oll kah tuukõrd kuigi esieräle mõosahe pilte pääle jäänü.
A õigõ oll, et tä näüdäs pääväpilte pääl alasi väega hää vällä – ku vaia, sõs armsa, ku vaia, sõs väkev, tõõnõkõrd kogoni peris ähvärdäjä ni pellätäv, nigu nuu leopardi jo periselt ommaki.
Ja alasi illos.
Tuu, et Tõnu oll periselt tõisist leopardõst tsipa vähämb, es paistu pilte päält vällä.
Aga stuudiohe, kon Tõnu palga iist modellis oll, passõ vähämb leopart väega häste, selle et sinnä ei olõs vast mõni peris suur volask sissegi mahtnu, miä sõs viil kargamisõst ja saagi takanajamisõst kõnõlda.
Jahti pidävä leopardi pilte miildü kõigilõ kõgõ inämb tetä.
Tõnulõ hindäle miildü, selle et tälle miildü ülepää egäsugumanõ sport.
Pildistäjäle miildü, selle et Tõnu oll veits kohma ja saa-as ilmangi üttegi saagis mõtõldut eläjät kätte – nii olõ-õs vaia stuudiopõrmandit kõikaig verest puhtas mõskõ.
Pääleki pelläs pildistäjä hirmsahe verd.
Ja saagilõ – arvakõ esi är, kas miildü!
Kõgõ inämb käve Tõnu himo hüppämisepilte tegemise perrä.
Tä oll sõs nigu täütsä marun õkva, tuisas stuudiot pite ringi nigu tuulispää ja mugu hüpäs, hüpäs! Õhun tundsõ tä hindä ollõv vaba nigu tsirk ja timä rõõmu võta-as sukugi veidembäs ka tuu, et egä hüppämine alasi kõrd otsa sai – inämbüsi viil kõva prändsähtüsega.
Ei, hallus peku ja mõnõ sinidsõ kotusõ lätsi timä arust ekäpite asa ette, ku õnnõ karada sai.
Ja perän pilte kaiõn oll Tõnul iks tundminõ, et ega tä periselt jo nii perädü kohmats kah olõ-i, õnnõ kibõnakõnõ.
Vai et mis sõs, ku tä omgina kohmats ja kunagi üttegi saaki kätte ei saa – timäl olõ-i määnestki saaki tarvis kah, selle et täl om tüü, mink iist saa palka ja tuu palga iist või söögi- ja muid häid asjo poodist osta.
Ja nigunii elämine ja prii süük olli täl ka joba olõman: eläjätahran, kon ta oll poolõ kotusõga leopardis.
Nii et palga iist sai tä osta magusatsüüki ja kõgõsugumast muud keelehääd.
Ja pühhi aigo mõnõ ilosa tihtsä kammi vai midägi.