2001-3000/LIT2670AC56.xml

<?xml version="1.0" encoding="UTF-8"?><?xml-model href="https://raw.githubusercontent.com/BetaMasaheft/Schema/master/tei-betamesaheft.rng" 
schematypens="http://relaxng.org/ns/structure/1.0"?><?xml-model href="https://raw.githubusercontent.com/BetaMasaheft/Schema/master/tei-betamesaheft.rng" 
type="application/xml" schematypens="http://purl.oclc.org/dsdl/schematron"?><TEI xmlns="http://www.tei-c.org/ns/1.0" type="work" xml:lang="en" xml:id="LIT2670AC56">
   <teiHeader xml:base="https://betamasaheft.eu/">
      <fileDesc>
         <titleStmt>
            <title xml:id="t1">Apostolic canons (56)</title>
            <editor role="generalEditor" key="AB"/>
            <editor key="AB"/>
            <funder>Akademie der Wissenschaften in Hamburg</funder>
         </titleStmt>
         <publicationStmt>
            <authority>Hiob-Ludolf-Zentrum für Äthiopistik</authority>
            <publisher>Die Schriftkultur des christlichen Äthiopiens und Eritreas: Eine multimediale Forschungsumgebung / Beta maṣāḥǝft</publisher>
            <pubPlace>Hamburg</pubPlace>
            <availability>
               <licence target="http://creativecommons.org/licenses/by-sa/4.0/">
                  <p>
                                    This file is licensed under the Creative Commons
                                    Attribution-ShareAlike 4.0. </p>
               </licence>
            </availability>
         </publicationStmt>
         <sourceDesc>
            <p>Work of the literatures of Ethiopia and Eritrea</p>
         </sourceDesc>
         <sourceDesc>
            <p/>
         </sourceDesc>
      </fileDesc>
      <encodingDesc>
         <xi:include xmlns:xi="http://www.w3.org/2001/XInclude" href="https://raw.githubusercontent.com/BetaMasaheft/Documentation/master/prefixDef.xml">
            <xi:fallback>
               <p>Definitions of prefixes used.</p>
            </xi:fallback>
         </xi:include>
      </encodingDesc>
      <profileDesc>
         <langUsage><language ident="en">English</language><language ident="gez">Gǝʿǝz</language></langUsage>
         <textClass>
            <keywords>
               <term key="ChristianLiterature"/>
               <term key="CanonLaw"/>
            </keywords>
         </textClass>
      </profileDesc>
      <revisionDesc>
         <change who="PL" when="2016-07-26">Created XML record from Ethio authority google spreadsheet</change>
         <change who="AB" when="2018-03-16">Provided text</change>
      </revisionDesc>
   </teiHeader>
   <text xml:base="https://betamasaheft.eu/">
      <body>
         <div type="edition" xml:lang="gez">
            
            <div type="textpart" subtype="paragraph" n="0">
               <ab> በስመ፡ አብ፡ ወወልድ፡ ወመንፈስ፡ ቅዱስ፡ አሐዱ፡ አምላክ። ሴኖዶስ፡ ዘቤተ፡ ክርስቲያን፡ ዘወሀብዋ፡ ሐዋርያት፡ በእደ፡ ቀሌምንጦስ፡ ቀዲሙ፡ ዘለአክዎ
            </ab>
            </div>
            <div type="textpart" subtype="paragraph" n="1">
               <ab> ትእዛዝ፡ ፩። በእንተ፡ ስፍነ፡ ኤጲስ፡ ቆጶሳት፡ የሀልው፡ በሢመተ፡ ኤጲስ፡ ቆጶስ። ይሠየም፡ ኤጲስ፡ ቆጶስ፡ በክልኤቱ፡ አው፡ በሠለስቱ፡ ኤጲስ፡ ቆጶሳት። ቀሲስ፡ ወዲያቆን፡ ወእለ፡ ተርፉ፡ ሥዩማን፡ ይሠየሙ፡ በመባሕተ፡ አሐዱ፡ ኤጲስ፡ ቆጶስ
            </ab>
            </div>
            <div type="textpart" subtype="paragraph" n="2">
               <ab> ትእዛዝ፡ ፪። በእንተ፡ ዘመፍትው፡ ያብኡ፡ ውስተ፡ ምሥዋዕ። ለእመ፡ አብአ፡ ኤጲስ፡ ቆጶስ፡ አው፡ ቀሲስ፡ ምንተኒ፡ ውስተ፡ ምሥዋዑ፡ ለእግዚአብሔር፡ ባዕደ፡ ዘእንበለ፡ ዘአዘዝነ፡ ዘያበውኡ፡ ወያዐርጉ፡ ቍርባነ፡ አው፡ ያበውኡ፡ መዓረ፡ አው፡ ሐሊበ፡ አው፡ እምአዕዋፍ፡ አው፡ እንስሳ፡ ካልአ፡ ዘእንበለ፡ ዘአዘዘ፡ እግዚእነ፡ ለይትመተር። ወኢይደሉ፡ ያብኡ፡ ምንተኒ፡ ውስተ፡ ምሥዋዕ፡ ዘእንበለ፡ ሠዊት፡ ወአስካል፡ በመዋዕሊሁ፡ ወቅብአ፡ ማኅቶት፡ ንጹሕ፡ ወዕጣን፡ በጊዜ፡ ቍርባን፡ ንጹሕ። ወእለ፡ ተርፉ፡ ፍሬያት፡ ይፈንዉ፡ ውስተ፡ ቤት፡ ወይኩኑ፡ ለኤጲስ፡ ቆጶስ፡ ወለቀሳውስት፡ ወባሕቱ፡ ኢያብእዎሙ፡ ውስተ፡ ምሥዋዕ። ወይትካፈልዎሙ፡ ኤጲስ፡ ቆጶሳት፡ ወቀሳውስት፡ ወላዕለ፡ እለ፡ ተርፉ፡ ሥዩማን
            </ab>
            </div>
            <div type="textpart" subtype="paragraph" n="3">
               <ab> ትእዛዝ፡ ፫። ወኢይስድድ፡ ኤጲስ፡ ቆጶስ፡ ብእሲቶ፡ ወቀሲስ፡ ወዲያቆን፡ በምክንያተ፡ መልእክተ፡ እግዚአብሔር። ወለእመ፡ ሰደዱ፡ ይትፈለጡ። ወለእመ፡ ኢያግብኡ፡ ወኢያብእዋ፡ ይትመተሩ
            </ab>
            </div>
            <div type="textpart" subtype="paragraph" n="4">
               <ab> ትእዛዝ፡ ፬። በእንተ፡ ዕለት፡ ዘመፍትው፡ ይግበሩ፡ ፋሲካ። ወለእመ፡ ገብሩ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ቅድስተ፡ ፋሲካ፡ ምስለ፡ አይሁድ፡ እምቅድመ፡ የዐሪ፡ ሌሊተ፡ ወመዐልተ፡ ለይትመተሩ
            </ab>
            </div>
            <div type="textpart" subtype="paragraph" n="5">
               <ab> ትእዛዝ፡ ፭። ወኢይደመሩ፡ ኤጲስ፡ ቆጶስ፡ ወቀሲስ፡ ወዲያቆን፡ ውስተ፡ ግብረ፡ ዝንቱ፡ ዓለም፡ ወለእመ፡ ተደመሩ፡ ይትፈለጡ
            </ab>
            </div>
            <div type="textpart" subtype="paragraph" n="6">
               <ab> ትእዛዝ፡ ፮። እመሂ፡ ኤጲስ፡ ቆጶስ፡ አው፡ አሐዱ፡ እምካህናት፡ ዘኢተመጠወ፡ ቍርባነ፡ በጊዜ፡ ቅዳሴ፡ ዘእንበለ፡ ይንግር፡ ምክንያቶ፡ በዝንቱ። ወለእመ፡ ኮነ፡ ዘኢይደልዎ፡ ይስረዩ፡ ሎቱ፡ ወለእመ፡ ኢነገረ፡ ምክንያቶ፡ ይሰደድ፡ እስመ፡ ኮነ፡ መርሐ፡ ከመ፡ ይኩን፡ ለሕዝብ፡ ኀጢአተ፡ ወረሰዮሙ፡ ይትዐቀፉ፡ ላዕለ፡ ዘአዕረገ፡ ቍርባነ፡ ከመ፡ ዘኢያዕረገ፡ በንጹሕ
            </ab>
            </div>
            <div type="textpart" subtype="paragraph" n="7">
               <ab> ትእዛዝ፡ ፯። ኵሉ፡ መሀይምን፡ ዘይበውእ፡ ውስተ፡ ቤተ፡ ክርስቲያን፡ ወይሰምዕ፡ መጻሕፍተ፡ ወኢይቀውም፡ እስከ፡ ይገብሩ፡ ጸሎተ፡ ወኢይትመጠው፡ ቍርባነ፡ ቅዱሰ፡ ወኢይጸልዩ፡ ላዕሌሁ፡ ወይደልዎ፡ ይሰደድ፡ እስመ፡ ገብረ፡ ጋእዘ፡ ወሁከተ፡ ለቤተ፡ ክርስቲያን
            </ab>
            </div>
            <div type="textpart" subtype="paragraph" n="8">
               <ab> ትእዛዝ፡ ፰። ወለእመቦ፡ ዘጸለየ፡ ምስለ፡ ዘኢይሳተፍ፡ ምሥጢረ፡ ለእመሂ፡ በቤት፡ ይሰደድ
            </ab>
            </div>
            <div type="textpart" subtype="paragraph" n="9">
               <ab> ትእዛዝ፡ ፱። ወኢይጸልዩ፡ ምስለ፡ ዘተሰደ። ወለእመ፡ ጸለየ፡ አሐዱ፡ እምካህናት፡ ምስለ፡ አሐዱ፡ ካህን፡ ዘተሰደ፡ ይሰደድ፡ ውእቱኒ
            </ab>
            </div>
            <div type="textpart" subtype="paragraph" n="10">
               <ab> ትእዛዝ፡ ፲። ወለእመ፡ ሖረ፡ አሐዱ፡ እምካህናት፡ አው፡ ሕዝባዊ፡ ዘተሰደ፡ ውስተ፡ ሀገር፡ ከመ፡ ዘኢተሰደ፡ ወይበውእ፡ ውስተ፡ ይእቲ፡ ሀገር፡ ዘእንበለ፡ በመባሕት፡ ወይሠየም፡ ይሰደድ፡ ውእቱኒ፡ ወዘሤሞሂ። ወለእመ፡ ሀሎ፡ አፍኣ፡ ይሰደድ፡ እንተ፡ አፍአሁ፡ ነዋኀ፡ መዋዕለ፡ እስመ፡ ሐሰወ፡ ቤተ፡ ክርስቲያኑ፡ ለእግዚአብሔር
            </ab>
            </div>
            <div type="textpart" subtype="paragraph" n="11">
               <ab> ትእዛዝ፡ ፲፩። ኢመፍትው፡ ለኤጲስ፡ ቆጶስ፡ ይኅድግ፡ ሢመቶ፡ ወይሠየም፡ ኀበ፡ ካልእ፡ ወለእመ፡ አስተሓመምዎ፡ ሕዝብ፡ ዘእንበለ፡ በምክንያተ፡ ረባሕ፡ ወያስተሓምምዎ፡ ከመ፡ ይግበር፡ ከማሁ፡ እስመ፡ ይክል፡ ያርብሖሙ፡ ለእለ፡ ህየ፡ በነገረ፡ ጽድቅ። ወዘንተኒ፡ ኢይግበር፡ በባሕቲቱ፡ አላ፡ በፍትሐ፡ ብዙኃን፡ ኤጲስ፡ ቆጶሳት፡ ወበዐቢይ፡ አስተብቍዖት፡ ፈድፋደ
            </ab>
            </div>
            <div type="textpart" subtype="paragraph" n="12">
               <ab> ትእዛዝ፡ ፲፪። እመሂ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ አው፡ አሐዱ፡ እመዓርገ፡ ካህናት፡ ለእመ፡ ኀደገ፡ መንበሮ፡ ወየሐውር፡ ኀበ፡ ካልእ፡ መንበር፡ ወይነብር፡ በውእቱ፡ መካን፡ ለነዋኅ፡ መዋዕል፡ ፈሊሶ፡ ዘእንበለ፡ መባሕተ፡ ኤጲስ፡ ቆጶስ፡ ንሕነ፡ ንኤዝዝ፡ ከመ፡ ኢይትለአክ፡ ለዓለም፡ ወፈድፋደሰ፡ ለእመ፡ ለአከ፡ ኀቤሁ፡ ኤጲስ፡ ቆጶስ፡ ከመ፡ ይግባእ፡ ኀበ፡ መካኑ፡ ወኢሰምዖ፡ ይሰደድ፡ እምሢመቱ፡ ወይቅረብ፡ በመካን፡ ኀበ፡ ሀሎ፡ ከመ፡ ሕዝባዊ። ወለእመ፡ ተወክፎ፡ ኤጲስ፡ ቆጶስ፡ ዘሀሎ፡ ኀቤሁ፡ ከመ፡ አሐዱ፡ እምካህናት፡ ወይሬሲ፡ ዘንተ፡ ኵነኔ፡ ዘፈታሕነ፡ ከመ፡ ከንቱ፡ ይሰደድ፡ ውእቱኒ፡ ኤጲስ፡ ቆጶስ፡ ከመ፡ መምህረ፡ ዕልወተ፡ ሕግ
            </ab>
            </div>
            <div type="textpart" subtype="paragraph" n="13">
               <ab> ትእዛዝ፡ ፲፫። በእንተ፡ ዘአውሰበ፡ ክልኤተ፡ አው፡ ማዕሰበ። ዘአውሰበ፡ ክልኤተ፡ አው፡ ዕቅብተ፡ እምድኅረ፡ ጥምቀት፡ ኢይከውኖ፡ ይሠየም፡ ኤጲስ፡ ቆጶስ፡ ወኢቀሲስ፡ ወኢዲያቆን፡ ወኢይደሉ፡ ይትኈለቍ፡ ምስለ፡ ሥዩማን፡ ካህናት፡ ግሙራ። ዘአውሰበ፡ ማዕሰበ፡ አው፡ እንተ፡ ተሐዘብዋ፡ አው፡ እንተ፡ አስተኀፈርዋ፡ አው፡ ዘማዊት፡ አው፡ አመት፡ አው፡ እንተ፡ ተሐውር፡ ኀበ፡ ተውኔት፡ ኢይከውኖ፡ ይሠየም፡ ኤጲስ፡ ቆጶስ፡ ወኢቀሲስ፡ ወኢዲያቆን፡ ወኢይትኈለቍ፡ ግሙራ፡ እምሥዩማን፡ ካህናት። አው፡ ዘነበረ፡ ምስለ፡ ክልኤ፡ አኃት፡ አው፡ ወለተ፡ እኁሁ፡ ኢይከውኖ፡ ይኩን፡ ካህነ
            </ab>
            </div>
            <div type="textpart" subtype="paragraph" n="14">
               <ab> ትእዛዝ፡ ፲፬። ካህን፡ ዘይትሐበይ፡ ብእሴ፡ ይትመተር
            </ab>
            </div>
            <div type="textpart" subtype="paragraph" n="15">
               <ab> ትእዛዝ፡ ፲፭። በእንተ፡ ኅጽዋን። ለእመ፡ ተኀጽወ፡ እምሰብእ፡ በትዕግልት፡ አው፡ ለእመ፡ መተርዎ፡ ኀፍረቶ፡ በውስተ፡ ጸብእ፡ አው፡ ተወልደ፡ ከማሁ፡ ለእመ፡ ይደልዎ፡ ይሠየም፡ ኤጲስ፡ ቆጶሰ። ወእመሰ፡ ኀጸወ፡ ርእሶ፡ ባሕቲቱ፡ ኢይኩን፡ እምሥዩማን፡ እስመ፡ ኮነ፡ ቀታሌ፡ ነፍሱ፡ ወጸላኤ፡ ለፍጥረተ፡ እግዚአብሔር። አሐዱ፡ እምሥዩማን፡ ለእመ፡ መተረ፡ ፍጥረቶ፡ ይስዐር፡ እስመ፡ ቀታሌ፡ ነፍሱ፡ ውእቱ፡ ባሕቲቱ። ሕዝባዊ፡ ዘየኀጹ፡ ርእሶ፡ ይሰደድ፡ ሠለስተ፡ ዓመተ፡ እስመ፡ ኮነ፡ ፀረ፡ ለሕይወቱ፡ ባሕቲቱ
            </ab>
            </div>
            <div type="textpart" subtype="paragraph" n="16">
               <ab> ትእዛዝ፡ ፲፮። በእንተ፡ ዘዘመወ፡ አው፡ መሐለ፡ በሐሰት፡ አው፡ ሰረቀ። ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ዘይትረከብ፡ በዝሙት፡ አው፡ በማሕላ፡ ሐሰት፡ አው፡ በሰሪቅ፡ ይሰዐር፡ ወኢይሰደድ፡ እስመ፡ ይብል፡ እግዚአብሔር፡ ኢይትቤቀል፡ ካዕበ፡ በአሐቲ፡ አበሳ
            </ab>
            </div>
            <div type="textpart" subtype="paragraph" n="17">
               <ab> ትእዛዝ፡ ፲፯። ወካዕበ፡ እለ፡ ተርፉ፡ ሥዩማን፡ እለ፡ እሙንቱ፡ አናጕንስጢስ፡ ወመዘምራን፡ ሶበ፡ ይበውኡ፡ ውስተ፡ ክህነት፡ ወፈቀዱ፡ አውስቦ፡ ያውስቡ። ወንሕነ፡ ንኤዝዞሙ፡ በባሕቲቶሙ፡ እንዘ፡ ሀለዉ፡ አናጕንስጢስ፡ ያውስቡ፡ ወባሕቱ፡ ኢይከውኖሙ፡ እምድኅረ፡ ተሠይሙ
            </ab>
            </div>
            <div type="textpart" subtype="paragraph" n="18">
               <ab> ትእዛዝ፡ ፲፰። በእንተ፡ ካህን፡ ዘይዘብጥ። ኵሎ፡ ኤጲስ፡ ቆጶስ፡ አው፡ ቀሲስ፡ ዘይዘብጥ፡ ክርስቲያናዌ፡ አው፡ ዘኢይአምን፡ ሶበ፡ ይኤብስ፡ ወይፈቅድ፡ በዝንቱ፡ ግብር፡ ከመዘ፡ ያፈርሆሙ፡ ለሰብእ፡ ንሕነ፡ ንኤዝዝ፡ ከመ፡ ይስዐሩ፡ እስመ፡ ኢአዘዘነ፡ እግዚእነ፡ ከመ፡ ንግበር፡ ዘንተ፡ ወኢበአሐቲ፡ መካን፡ እስመ፡ ሶበ፡ ይዘብጥዎ፡ ኢዘበጠ፡ ወእንዘ፡ ይጼዕልዎ፡ ኢጸዐለ፡ ወእንዘ፡ ያሐምምዎ፡ ኢተምዕዐ
            </ab>
            </div>
            <div type="textpart" subtype="paragraph" n="19">
               <ab> ትእዛዝ፡ ፲፱። በእንተ፡ ዘተስዕረ፡ በርቱዕ፡ እምካህናት። እመሂ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ዘተስዕረ፡ በርቱዕ፡ በእንተ፡ ኀጢአት፡ ዘተዐውቀ፡ ወደፈረ፡ ወቀርበ፡ የአኀዝ፡ መልእክቶ፡ እንተ፡ ትካት፡ በመዋዕለ፡ መባሕት፡ ወዝንቱ፡ ይርሐቅ፡ እምቤተ፡ ክርስቲያን፡ ግሙራ
            </ab>
            </div>
            <div type="textpart" subtype="paragraph" n="20">
               <ab> ትእዛዝ፡ ፳። በእንተ፡ ዘይሠየም፡ በሕልያን። እመሂ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ዘይእኅዝ፡ መዓርገ፡ ሢመት፡ በሕልያን፡ ይስዐር። ወይስዐር፡ ዘሤሞሂ፡ ወይትመተር፡ ለዝሉፉ፡ እምሥርዐተ፡ ክህነት፡ ወኢይሳተፍዎ፡ ወኢበምንተኒ፡ በከመ፡ ረሰይክዎ፡ ለሲሞን፡ መሠርይ፡ እምኀቤየ፡ አነ፡ ጴጥሮስ
            </ab>
            </div>
            <div type="textpart" subtype="paragraph" n="21">
               <ab> ትእዛዝ፡ ፳፩። በእንተ፡ ዘይትራዳእ፡ ከመ፡ የአኀዝ፡ ቤተ፡ ክርስቲያን። ለእመ፡ ተራድአ፡ ኤጲስ፡ ቆጶስ፡ ምኵናነ፡ በመኳንንተ፡ ዝንቱ፡ ዓለም፡ ወይመልክ፡ ቤተ፡ ክርስቲያን፡ ዘእምኀቤሆሙ፡ ለይትመተር፡ ወይሰደድ፡ ውእቱ፡ ወኵሎሙ፡ እለ፡ ተለውዎ
            </ab>
            </div>
            <div type="textpart" subtype="paragraph" n="22">
               <ab> ትእዛዝ፡ ፳፪። በእንተ፡ ቀሲስ፡ ዘይሜንን፡ ኤጲስ፡ ቆጶሰ። ወለእመ፡ መነነ፡ ቀሲስ፡ ኤጲስ፡ ቆጶሰ፡ ወይትፈለጥ፡ ወይገብር፡ ሎቱ፡ ምሥዋዐ፡ እንዘ፡ ኢይትረከብ፡ ላዕለ፡ ኤጲስ፡ ቆጶስ፡ ጌጋየ፡ በውስተ፡ ፍትሕ፡ በእንተ፡ ግብረ፡ እግዚአብሔር፡ እንዘ፡ ያረትዕ፡ ለይስዐር፡ ከመ፡ መፍቀሬ፡ ሢመት፡ ውእቱ፡ ወኵሎሙ፡ ካህናት፡ እለ፡ ተለውዎ፡ እስመ፡ ዐላዊ፡ ውእቱ። ወሕዝባዊያን፡ እለ፡ ተለውዎ፡ ይሰደዱ። ወዝንቱ፡ ይከውን፡ ሶበ፡ ይሴአሎሙ፡ ኤጲስ፡ ቆጶስ፡ ምዕረ፡ ወካዕበ፡ ወሥልሰ
            </ab>
            </div>
            <div type="textpart" subtype="paragraph" n="23">
               <ab> ትእዛዝ፡ ፳፫። በእንተ፡ ቀሲስ፡ አው፡ ዲያቆን፡ ዘሰደዶ። ኤጲስ፡ ቆጶስ፡ ለእመ፡ ሰደደ፡ ቀሲሰ፡ አው፡ ዲያቆነ፡ ካልእ፡ ኤጲስ፡ ቆጶስ፡ ኢይኅድጎ፡ ይባእ፡ ዘእንበለ፡ ለእመ፡ አብሖ፡ ውእቱ፡ ዘሰደዶ፡ አው፡ ለእመ፡ ሞተ
            </ab>
            </div>
            <div type="textpart" subtype="paragraph" n="24">
               <ab> ትእዛዝ፡ ፳፬። ኢይትወከፍ፡ ኤጲስ፡ ቆጶስ፡ ነኪረ፡ ቀሲስ፡ ወዲያቆን፡ አላ፡ ይትመጠዉ፡ ከመ፡ ንኡሳን፡ ካህናት፡ ዘእንበለ፡ ለእመ፡ ቦሙ፡ መባሕተ፡ ይሠየሙ፡ ወይደመሩ። ወለእመ፡ ኮኑ፡ ዜናዊያነ፡ ጽድቅ፡ ይባኡ፡ ወእመ፡ አኮ፡ የሀብዎሙ፡ ዘይፈቅዱ፡ ወኢይደመሩ፡ እስመቦ፡ ብዙኃን፡ እለ፡ ከመዝ፡ ከመ፡ ርሱሕ
            </ab>
            </div>
            <div type="textpart" subtype="paragraph" n="25">
               <ab> ትእዛዝ፡ ፳፭። መፍትው፡ ያእምር፡ ሊቀ፡ ጳጳሳት፡ ኤጲስ፡ ቆጶሳተ፡ ኵሉ፡ ብሔር። ወይደልዎሙ፡ ያእምርዎ፡ መኑ፡ ውእቱ፡ ቀዳሚ፡ በኀቤሆሙ፡ ወይስምይዎ፡ ሊቀ። ወኢይግበሩ፡ ዐቢየ፡ ምክረ፡ ዘእንበለ፡ በምክረ፡ ዘየዐቢ፡ ወይግበሩ፡ ለለ፡ አሐዱ፡ ግብሮሙ፡ ዘይደልዎሙ፡ ለሢመቶሙ፡ ወለሕዝብ፡ እለ፡ ውስተ፡ ምኵናኑ። ወባሕቱ፡ ዘይሠየም፡ ሊቀ፡ ላዕሌሆሙ፡ ኢይግበር፡ ምንተኒ፡ ዘእንበለ፡ በምክረ፡ ኤጲስ፡ ቆጶሳት፡ ኵሎሙ። ወከመዝ፡ ይከውን፡ አሐደ፡ ኅብረተ፡ ወይሴባሕ፡ እግዚአብሔር፡ በክርስቶስ፡ ኢየሱስ፡ ወመንፈስ፡ ቅዱስ። ኢይትኀበል፡ ኤጲስ፡ ቆጶስ፡ ከመ፡ ይሢም፡ አፍኣ፡ እምኵናኑ፡ ኀበ፡ ዘኢኮነ፡ ዚአሁ፡ አዕጻዳት። ወለእመ፡ ተረክበ፡ ከመ፡ ገብረ፡ ዘንተ፡ ዘእንበለ፡ ምክረ፡ ርእሰ፡ ውእቱ፡ መካን፡ ወአዕጻዳት፡ ወአህጉር፡ ለይስዐር፡ ውእቱኒ፡ ወእለ፡ ሤሞሙኒ
            </ab>
            </div>
            <div type="textpart" subtype="paragraph" n="26">
               <ab> ትእዛዝ፡ ፳፮። ወለእመ፡ ተሠይመ፡ ኤጲስ፡ ቆጶስ፡ ወኢገሠጸ፡ ወኢኀለየ፡ በእንተ፡ ሕዝብ፡ ዘተውህበ፡ ሎቱ፡ ይትፈለጥ፡ እስከ፡ ይጌሥጽ፡ ወከመዝ፡ ቀሲስ፡ ወዲያቆን። ወእመ፡ ሖረ፡ ኢይኅድግ፡ ከመ፡ ይባእ፡ ወአኮ፡ ውእቱ፡ በምክሩ፡ አላ፡ በምክረ፡ ሕዝብ፡ ወለሊሁሰ፡ ይንበር፡ እንዘ፡ ኤጲስ፡ ቆጶስ፡ ውእቱ፡ ወካህናትሰ፡ እለ፡ ሀገር፡ ይትፈለጡ፡ እስመ፡ ኢመሀሩ፡ ለሕዝብ፡ ከመዝ
            </ab>
            </div>
            <div type="textpart" subtype="paragraph" n="27">
               <ab> ትእዛዝ፡ ፳፯። ወይኩን፡ ጉባኤ፡ ኤጲስ፡ ቆጶሳት፡ ካዕበ፡ በዓመት፡ ወይጠይቁ፡ በእንተ፡ ሥርዐተ፡ መልእክተ፡ እግዚአብሔር፡ ወይፈክሩ፡ ስሕተተ፡ ወዕቅፍተ፡ ዘይከውን፡ በቤተ፡ ክርስቲያን። ወቀዳሚ፡ ጉባኤ፡ ይኩን፡ በመንፈቀ፡ ጰንጠቈስጤ፡ ወካልእ፡ ጉባኤ፡ አመ፡ ፲ወ፪፡ ለጥቅምት
            </ab>
            </div>
            <div type="textpart" subtype="paragraph" n="28">
               <ab> ትእዛዝ፡ ፳፰። ወየኀሊ፡ ኤጲስ፡ ቆጶስ፡ በእንተ፡ ቤተ፡ ክርስቲያን፡ ወይሥርዖሙ፡ ከመዘ፡ እግዚአብሔር፡ ነጸረ፡ ላዕሌሁ። ወኢይደልዎ፡ ይንሣእ፡ እምኔሆሙ፡ ረባሐ፡ ሎቱ፡ ለባሕቲቱ፡ ወኢይሀብ፡ ንዋየ፡ እግዚአብሔር፡ ለውሉደ፡ ዘመዱ፡ ወለእመሂ፡ ኮኑ፡ ነዳያነ፡ ወኢይደልዎ፡ ይንግድ፡ በንዋየ፡ ቤተ፡ ክርስቲያን፡ በምክንያተ፡ እሙንቱ
            </ab>
            </div>
            <div type="textpart" subtype="paragraph" n="29">
               <ab> ትእዛዝ፡ ፳፱። በእንተ፡ ተማክሮ፡ ኤጲስ፡ ቆጶስ። ኢይግበር፡ መኑሂ፡ እምቀሳውስት፡ ወዲያቆናት፡ ወኢምንተኒ፡ ዘእንበለ፡ በምክረ፡ ኤጲስ፡ ቆጶስ፡ እስመ፡ ውእቱ፡ ዘተአመነ፡ ላዕለ፡ ሕዝበ፡ እግዚአብሔር፡ ወውእቱ፡ ካዕበ፡ ዘያወሥእ፡ በእንተ፡ ነፍሶሙ
            </ab>
            </div>
            <div type="textpart" subtype="paragraph" n="30">
               <ab> ትእዛዝ፡ ፴። ወያእምሩ፡ ንዋየ፡ ኤጲስ፡ ቆጶስ፡ በባሕቲቱ፡ ለእመቦ፡ ንዋየ፡ ወያእምሩ፡ ንዋየ፡ እግዚአብሔር፡ ከመ፡ ሶበ፡ ይመውት፡ ኤጲስ፡ ቆጶስ፡ ይምለክ፡ ንዋዮ፡ ወየሀብ፡ ለዘፈቀደ፡ ከመ፡ ኢይትሀጐል፡ ንዋየ፡ ኤጲስ፡ ቆጶስ፡ በምክንያተ፡ ንዋየ፡ ቤተ፡ ክርስቲያን፡ አው፡ ለእመቦ፡ ኤጲስ፡ ቆጶስ፡ ብእሲተ፡ ወውሉደ፡ ወአዝማደ፡ አው፡ አግብርተ። እስመ፡ ኢኮነ፡ ርቱዐ፡ ከመ፡ ይትሀጐል፡ ንዋየ፡ ቤተ፡ ክርስቲያን፡ እስመ፡ ኢያእመሩ፡ ንዋየ፡ ኤጲስ፡ ቆጶስ፡ ወከመ፡ ኢይትሀጐል፡ ንዋየ፡ ኤጲስ፡ ቆጶስ፡ ወአዝማዲሁ፡ በእንተ፡ ምክንያተ፡ ንዋየ፡ ቤተ፡ ክርስቲያን፡ ወይወድቁ፡ ውስተ፡ ጾማ፡ ወይፀርፉ፡ ላዕለ፡ ሞቱ
            </ab>
            </div>
            <div type="textpart" subtype="paragraph" n="31">
               <ab> ትእዛዝ፡ ፴፩። በእንተ፡ ተአምኖ፡ ኤጲስ፡ ቆጶስ፡ ላዕለ፡ ንዋየ፡ ቤተ፡ ክርስቲያን። ንኤዝዝ፡ እንከ፡ ከመ፡ ይኩን፡ ኤጲስ፡ ቆጶሰ፡ ዘይመልክ፡ ንዋየ፡ ቤተ፡ ክርስቲያን፡ እስመ፡ ኮነ፡ ዘተአመነ፡ ላዕለ፡ ነፍሳተ፡ ሰብእ፡ ክቡር። ምንተ፡ እንከ፡ ኵሉ፡ ንዋየ፡ ዘተውህበ፡ ሎቱ፡ ከመ፡ የአዝዞሙ፡ በፈቃዱ፡ ወይሴሲ፡ ነዳያነ፡ እምኔሁ፡ በእደ፡ ቀሳውስት፡ ወዲያቆናት፡ በፈሪሀ፡ እግዚአብሔር፡ ወበረዓድ፡ ወይርክብ፡ ለሊሁኒ፡ እምኔሁ፡ ለመፍቅዱ፡ ለእመ፡ ኮነ፡ ጽኑሰ፡ በእንተ፡ ዘይፈቅዱ፡ በኀቤሁ፡ አኀው፡ ነግድ፡ እለ፡ ይሔውጽዎ፡ ከመ፡ ኢያኅጥኦሙ፡ እምኵሉ፡ ዘፈቀዱ፡ በኀቤሁ። እስመ፡ ሕገ፡ እግዚአብሔር፡ ይኤዝዞሙ፡ ለእለ፡ ይፀመዱ፡ ለምሥዋዕ፡ ይሴሰዩ፡ እምሥዋዕ፡ እስመ፡ ኢይጸብኡ፡ ሐራሁ፡ ለንጉሥ፡ ኀበ፡ ጸላእቱ፡ በሲሳየ፡ ነፍሶሙ
            </ab>
            </div>
            <div type="textpart" subtype="paragraph" n="32">
               <ab> ትእዛዝ፡ ፴፪። በእንተ፡ እለ፡ የሐውሩ፡ ኀበ፡ ተውኔት። ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ዘየሐውር፡ ኀበ፡ ተውኔት፡ ወየዐውድ፡ ወያበዝኅ፡ ስካረ፡ ለይኅድግ፡ ወእመ፡ አኮ፡ ይሰደድ። ንፍቀ፡ ዲያቆን፡ ወአናጕንስጢስ፡ ወመዘምራን፡ ለእመ፡ ገብሩ፡ ዘንተ፡ ምግባረ፡ ለይኅድጉ፡ ወእመ፡ አኮ፡ ይሰደዱ፡ ወከማሁ፡ ሕዝባዊያንኒ። ኤጲስ፡ ቆጶስ፡ ወቀሲስ፡ ወዲያቆን፡ ዘያአምር፡ ወየኀድግ፡ በድልው፡ ይክላእ፡ ወእመ፡ አኮ፡ ይትመተር
            </ab>
            </div>
            <div type="textpart" subtype="paragraph" n="33">
               <ab> ትእዛዝ፡ ፴፫። ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ዘየሐውር፡ ኀበ፡ ጥምቀተ፡ ዕልዋን፡ አው፡ ኀበ፡ ቍርባኖሙ፡ ንሕነ፡ ንኤዝዝ፡ ከመ፡ ይትመተሩ። ምንተ፡ እንከ፡ ይእቲ፡ ሥምረቱ፡ ለክርስቶስ፡ ምስለ፡ ሰይጣን፡ ወአይ፡ ክፍል፡ ለመሀይምናን፡ ምስለ፡ ዘኢይአምን
            </ab>
            </div>
            <div type="textpart" subtype="paragraph" n="34">
               <ab> ትእዛዝ፡ ፴፬። በእንተ፡ ስዕረቱ፡ ለዘ፡ ያስተራኵስ፡ አውስቦ። እመቦ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ አው፡ አሐዱ፡ እምሥዩማን፡ ካህናት፡ ዘአበየ፡ አውስቦ፡ ወበሊዐ፡ ሥጋ፡ ወሰቲየ፡ ወይን፡ ወአኮ፡ በእንተ፡ ተፀምዶ፡ አላ፡ ከመ፡ ርኩሳን፡ ወረሰዮሙ፡ መጽሐፍ፡ ከመ፡ ኵሎሙ፡ ሠናይ፡ ወእግዚአብሔር፡ ፈጠሮ፡ ለሰብእ፡ ተባዕተ፡ ወአንስተ፡ ወከመዝ፡ ውእቱ፡ ይፀርፍ፡ ለይኅድግ፡ ወእመ፡ አኮ፡ ለይትመተር፡ ወይፃእ፡ እምቤተ፡ ክርስቲያን፡ ወከማሁ፡ ሕዝባዊኒ
            </ab>
            </div>
            <div type="textpart" subtype="paragraph" n="35">
               <ab> ትእዛዝ፡ ፴፭። በእንተ፡ ምትረቱ፡ ለዘ፡ ኢይትዌከፎሙ፡ ለእለ፡ ይኔስሑ። ለእመ፡ ኢፈቀደ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ዘኢይትዌከፎ፡ ለዘ፡ ይኔስሕ፡ እምኀጢአቱ፡ ለይትመተር፡ እስመ፡ አሕመመ፡ ልበ፡ እግዚአብሔር፡ ዘይቤ፡ ይከውን፡ ፍሥሓ፡ በሰማያት፡ በእንተ፡ አሐዱ፡ ኃጥእ፡ ዘይኔስሕ
            </ab>
            </div>
            <div type="textpart" subtype="paragraph" n="36">
               <ab> ትእዛዝ፡ ፴፮። ለእመ፡ ኢበልዐ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ንስቲተ፡ ሥጋ፡ ወኢሰትየ፡ ሕዳጠ፡ ወይነ፡ በመዋዕለ፡ በዓላት፡ ወበኅቡእ፡ ያስተኀፍሮሙ፡ ወኮነ፡ መርሐ፡ ለዕቅፍተ፡ ሕዝብ፡ ለይትመተር
            </ab>
            </div>
            <div type="textpart" subtype="paragraph" n="37">
               <ab> ትእዛዝ፡ ፴፯። ለእመ፡ ተረክበ፡ እምካህናት፡ ዘይበልዕ፡ በውስተ፡ ምሥያጣት፡ ወይሰቲ፡ ይትፈለጥ፡ አላ፡ ለእመ፡ ኮነ፡ በማኅደረ፡ ነግድ፡ በእንተ፡ ምንዳቤ፡ በፍኖት፡ ወበማኅደር። ወለእመ፡ ጸዐለ፡ አሐዱ፡ እምሥዩማን፡ ኤጲስ፡ ቆጶሰ፡ ለይትመተር፡ እስመ፡ ይቤ፡ ለመኰንነ፡ ሕዝብከ፡ ኢታሕሥም፡ ቃለ። ወለእመ፡ ጸዐለ፡ አሐዱ፡ እምንኡሳን፡ ካህናት፡ ቀሲሰ፡ አው፡ ዲያቆነ፡ ይሰደድ። ለእመ፡ ተሳለቀ፡ አሐዱ፡ እምካህናት፡ ጽሙመ፡ አው፡ ሐንካሰ፡ አው፡ ዕዉረ፡ አው፡ አሐደ፡ ዘጽውስ፡ እገሪሁ፡ ይሰደድ፡ ወከማሁ፡ ሕዝባዊኒ፡ ለእመ፡ ገብረ፡ ዘንተ
            </ab>
            </div>
            <div type="textpart" subtype="paragraph" n="38">
               <ab> ትእዛዝ፡ ፴፰። በእንተ፡ ኤጲስ፡ ቆጶስ፡ አው፡ ቀሲስ፡ ዘኢይሜህር፡ ለሕዝብ፡ ተቀንዮ፡ ለእግዚአብሔር። ኤጲስ፡ ቆጶስ፡ አው፡ ቀሲስ፡ ዘያሰትት፡ ለካህናት፡ ወለሕዝብ፡ ወኢይሜህሮሙ፡ መልእክተ፡ እግዚአብሔር፡ ይሰደድ፡ ወለእመ፡ ነበረ፡ በአስትቶ፡ ይሰዐር
            </ab>
            </div>
            <div type="textpart" subtype="paragraph" n="39">
               <ab> ትእዛዝ፡ ፴፱። ኤጲስ፡ ቆጶስ፡ አው፡ ቀሲስ፡ ሶበ፡ ተሀየየ፡ በእንተ፡ ዘይጼነስ፡ እምካህናት፡ ወኢያስተማስሎ፡ በዘ፡ ይሁቦ፡ ለመፍቅዱ፡ ይሰደድ። ወለእመ፡ ነበረ፡ በተሀይዮ፡ ይሰዐር፡ ከመ፡ ዘቀተለ፡ እኁሁ
            </ab>
            </div>
            <div type="textpart" subtype="paragraph" n="40">
               <ab> ትእዛዝ፡ ፵። እመቦ፡ ዘአርአየ፡ መጻሕፍተ፡ ዘጸሐፉ፡ ዕልዋን፡ በሐሰት፡ ወአብአ፡ ውስተ፡ ቤተ፡ ክርስቲያን፡ ከመ፡ ዘቅዱሳት፡ መጻሕፍት፡ ለመሥገርተ፡ ሕዝብ፡ ወካህናት፡ ይስዐር
            </ab>
            </div>
            <div type="textpart" subtype="paragraph" n="41">
               <ab> ትእዛዝ፡ ፵፩። በእንተ፡ ካህን፡ ዘይዛለፍዎ፡ በዝሙት፡ አው፡ ካልእ። ለእመ፡ ኮነ፡ ጋእዘ፡ ኀበ፡ መሀይምናን፡ በዝሙት፡ አው፡ በምርዐት፡ አው፡ በካልእ፡ ግብር፡ ዘኢይደሉ፡ ወለእመ፡ ተዛለፍዎ፡ ኢይኩን፡ እምካህናት
            </ab>
            </div>
            <div type="textpart" subtype="paragraph" n="42">
               <ab> ትእዛዝ፡ ፵፪። በእንተ፡ ክሕደተ፡ ክርስቶስ፡ ወክሕደተ፡ ክህነት። አሐዱ፡ እምሥዩማን፡ ለእመ፡ ክሕደ፡ በእንተ፡ ፍርሀተ፡ ሰብእ፡ አው፡ እምአይሁድ፡ አው፡ እምአረሚ፡ ወዕልዋን፡ ለእመ፡ ኮነ፡ ውእቱ፡ ስመ፡ ክርስቶስ፡ ዘክሕደ፡ ይሰደድ፡ ወለእመ፡ ኮነ፡ ውእቱ፡ ስመ፡ ክህነት፡ ይስዐር። ወለእመ፡ ተነስሐ፡ ውእቱ፡ ይትወከፍዎ፡ ወይባእ፡ ከመ፡ ሕዝባዊ
            </ab>
            </div>
            <div type="textpart" subtype="paragraph" n="43">
               <ab> ትእዛዝ፡ ፵፫። ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ አው፡ አሐዱ፡ እምሥዩማን፡ ካህናት፡ ለእመ፡ በልዐ፡ ሥጋ፡ ዘቦቱ፡ ደመ፡ ነፍሱ፡ ዘኢጥቡሕ፡ አው፡ ዘነሰኮ፡ አርዌ፡ አው፡ ማውታ፡ ለይስዐር፡ ውእቱ፡ በከመ፡ አዘዘ፡ ቦቱ፡ ሕግ፡ ወለእመ፡ ኮነ፡ ሕዝባዊ፡ ይሰደድ
            </ab>
            </div>
            <div type="textpart" subtype="paragraph" n="44">
               <ab> ትእዛዝ፡ ፵፬። ለእመ፡ ተረክበ፡ አሐዱ፡ እምካህናት፡ ዘይጸውም፡ በዕለተ፡ እሑድ፡ አው፡ በዕለተ፡ ሰንበት፡ ዘእንበለ፡ ሰንበት፡ ዐባይ፡ ባሕቲታ፡ እንተ፡ ፋሲካ፡ ይስዐር
            </ab>
            </div>
            <div type="textpart" subtype="paragraph" n="45">
               <ab> ትእዛዝ፡ ፵፭። ለእመ፡ ቦአ፡ አሐዱ፡ እምካህናት፡ አው፡ ሕዝባዊ፡ ውስተ፡ ምኵራበ፡ አይሁድ፡ ወመካነ፡ ዕልዋን፡ ከመ፡ ይጸልዩ፡ ካህናት፡ ይስዐሩ፡ ወሕዝባዊ፡ ይሰደድ። በእንተ፡ ዘይዘብጥ፡ ሰብአ፡ እስከ፡ ይመውት፡ ወዘይትኄየል፡ ድንግለ። ካህን፡ ለእመ፡ ተባአሰ፡ ምስለ፡ ካልእ፡ ዘይዘብጦ፡ ወይመውት፡ ይሰዐር፡ በእንተ፡ ግዝፈ፡ ልቡ። ወለእመ፡ ኮነ፡ ሕዝባዊ፡ ይሰደድ። ወለእመ፡ ተዐገለ፡ ሕዝባዊ፡ ድንግለ፡ እምቅድመ፡ ትትፈኀር፡ ወይከውን፡ ምስሌሃ፡ ይሰደድ። ወኢያውስብ፡ ካልእተ፡ አላ፡ ይንበር፡ ምስለ፡ እንተ፡ ተኀየላ፡ ወለእመ፡ ኮነት፡ ነዳይተ፡ ወሕሥምተ
            </ab>
            </div>
            <div type="textpart" subtype="paragraph" n="46">
               <ab> ትእዛዝ፡ ፵፮። በእንተ፡ ዘይሠየም፡ ካዕበ። ለእመ፡ ረከበ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ክልኤ፡ ጊዜ፡ ተሠዪሞ፡ ይስዐር፡ ውእቱኒ፡ ወዘሤሞ። አላ፡ ለእመ፡ ተዐውቀ፡ ከመ፡ ተሠይሙ፡ እምኀበ፡ ዕልዋን፡ እስመ፡ ኢይከውን፡ ግሙራ፡ ከመ፡ ይኩኑ፡ እለ፡ ተጠምቁ፡ አው፡ ተሠይሙ፡ እምሰብእ፡ ዘከመዝ፡ ኢይከውኑ፡ መሀይምናነ፡ ወኢካህናተ
            </ab>
            </div>
            <div type="textpart" subtype="paragraph" n="47">
               <ab> ትእዛዝ፡ ፵፯። በእንተ፡ ዘኢይጸውም፡ ጾመ፡ አርብዓ፡ ወረቡዐ፡ ወዐርበ። ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ አው፡ አናጕንስጢስ፡ አው፡ መዘምር፡ ለእመ፡ ኢጾመ፡ አርብዓ፡ ቅዱሰ፡ ወረቡዐ፡ ወዐርበ፡ ይስዐር፡ ለእመ፡ ኢከልኦ፡ ሕማም፡ ዘሥጋ። ወለእመ፡ ኮነ፡ ሕዝባዊ፡ ይሰደድ
            </ab>
            </div>
            <div type="textpart" subtype="paragraph" n="48">
               <ab> ትእዛዝ፡ ፵፰። ለእመ፡ ጾመ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ አው፡ እምሥዩማን፡ ምስለ፡ አይሁድ፡ ወይገብር፡ ፋሲካ፡ ምስሌሆሙ፡ አው፡ ይትወከፍ፡ በኀቤሆሙ፡ አምኃ፡ በዓሎሙ፡ ናእተ፡ አው፡ ዘይመስሎ፡ ይስዐር፡ ወለእመ፡ ኮነ፡ ሕዝባዊ፡ ይሰደድ። ሕዝባዊ፡ ለእመ፡ ወሰደ፡ ኀበ፡ ምኵራበ፡ አይሁድ፡ ወምኵራበ፡ አሕዛብ፡ ቅብአ፡ ወማኅቶተ፡ ይስዐር
            </ab>
            </div>
            <div type="textpart" subtype="paragraph" n="49">
               <ab> ትእዛዝ፡ ፵፱። በእንተ፡ ዘይሰርቅ፡ ዘይተ፡ አው፡ ሠምዐ፡ አው፡ ዘኮነ፡ እምንዋየ፡ ቤተ፡ ክርስቲያን። ለእመ፡ ሰረቀ፡ ሥዩም፡ ሠምዐ፡ እምቤተ፡ ክርስቲያን፡ አው፡ ቅብአ፡ ለይሰደድ፡ ወይፍዲ፡ ዘሰረቀ፡ ትኅምስተ። ንዋየ፡ ብሩር፡ ወአልባስ፡ ለእመ፡ አስተርአዩ፡ ሕዳጠ፡ መዋዕለ፡ ኢይንሣእ፡ እምኔሁ፡ ምንተኒ፡ ለርእሱ፡ ባሕቲቱ፡ እስመ፡ ዝንቱ፡ ግብር፡ ኀጢአት፡ ውእቱ፡ ወለእመቦ፡ ዘገብረ፡ ዘንተ፡ ይስድድዎ፡ ወይትበቀልዎ
            </ab>
            </div>
            <div type="textpart" subtype="paragraph" n="50">
               <ab> ትእዛዝ፡ ፶። በእንተ፡ ኤጲስ፡ ቆጶስ፡ ዘአስተዋደይዎ። ሶበ፡ ያስተዋድይዎ፡ ለኤጲስ፡ ቆጶስ፡ ሰብእ፡ መሀይምናን፡ ጻድቃን፡ ወኄራን፡ ግብር፡ ውእቱ፡ ይጸውዕዎ፡ ለኀበ፡ ኤጲስ፡ ቆጶሳት። ወለእመ፡ መጽአ፡ ወይትአመን፡ ኀጢአቱ፡ ካዕበ፡ ይዛለፍዎ፡ ወይፍትሑ፡ ላዕሌሁ፡ በኵነኔ፡ ዘይደሉ። ወለእመ፡ ጸውዕዎ፡ ወኢመጽአ፡ ወይጸውዕዎ፡ ካዕበ፡ ኀበ፡ ክልኤቱ፡ ኤጲስ፡ ቆጶሳት፡ ይልአኩ፡ ኀቤሁ። ወለእመ፡ ኢተሰጥወ፡ ካዕበ፡ ይጸውዕዎ፡ ሥልሰ፡ ይልአኩ፡ ኀቤሁ፡ ዳግመ፡ ክልኤቱ፡ ኤጲስ፡ ቆጶሳት። ወለእመ፡ ኢተሰጥወ፡ ወአስተተ፡ ወኢመጽአ፡ ይፍትሑ፡ ላዕሌሁ፡ እለ፡ ተጋብኡ፡ በዘይደሉ፡ ከመ፡ ኢይኩን፡ ከመ፡ ዘተዛለፍዎ፡ እስመ፡ ጐየ፡ እምፍትሕ
            </ab>
            </div>
            <div type="textpart" subtype="paragraph" n="51">
               <ab> ትእዛዝ፡ ፶፩። ከመ፡ ኢይስምዑ፡ ስምዐ፡ ዕልው፡ ላዕለ፡ ኤጲስ፡ ቆጶስ፡ ወኢስምዐ፡ አሐዱ፡ ኤጲስ፡ ቆጶስ። ኢይትወከፉ፡ ስምዐ፡ እምዕልዋን፡ ላዕለ፡ ኤጲስ፡ ቆጶስ፡ ወኢይትወከፉ፡ ስምዐ፡ አሐዱ፡ ኤጲስ፡ ቆጶስ፡ እስመ፡ እምአፈ፡ ክልኤቱ፡ ወሠለስቱ፡ ይቁም፡ ኵሉ፡ ነገር። ወኢይከውኖ፡ ለኤጲስ፡ ቆጶስ፡ የሀብ፡ ሢመተ፡ ኤጲስ፡ ቆጶስና፡ ለእኁሁ፡ አው፡ ለውሉዱ፡ አው፡ ለአዝማዲሁ፡ ወኢይሢም፡ ዘፈቀደ፡ እስመ፡ ኢኮነ፡ ርቱዕ፡ ከመ፡ ይትዋረሱ፡ ኤጲስ፡ ቆጶስና፡ ወኢየሀብ፡ ንዋየ፡ እግዚአብሔር፡ በእንተ፡ ፈቃደ፡ ሰብእ። ወኢይደሉ፡ ይረስያ፡ ለቤተ፡ ክርስቲያኑ፡ ለክርስቶስ፡ ርስተ። ለእመ፡ ገብሩ፡ ከመዝ፡ ወይነሥኡ፡ ሢመተ፡ ይኩኑ፡ ከመ፡ ዘአልቦ፡ ወለሊሁኒ፡ ይትኰነን፡ በፍትሕ። አሐዱ፡ ዘነቋር፡ ዐይኑ፡ አው፡ ሐንካስ፡ እግሩ፡ ወይደልዎ፡ ኤጲስ፡ ቆጶስና፡ ይሠየም፡ እስመ፡ ነውረ፡ ሥጋ፡ ኢያረኵስ፡ አላ፡ ነውረ፡ ነፍስ። ጽሙም፡ ወዕውር፡ ኢይሠየም፡ ኤጲስ፡ ቆጶሰ፡ አኮ፡ ርኩሰ፡ ዘኮነ፡ አላ፡ ከመ፡ ኢይዘረው፡ ንዋየ፡ ቤተ፡ ክርስቲያን። ዘቦ፡ ጋኔነ፡ ኢይሠየም፡ ካህነ፡ ወኢይጸሊ፡ ምስለ፡ መሀይምናን፡ ወለእመ፡ ነጽሐ፡ ያብእዎ፡ ወለእመ፡ ይደልዎ፡ ይሠየም፡ ካህነ
            </ab>
            </div>
            <div type="textpart" subtype="paragraph" n="52">
               <ab> ትእዛዝ፡ ፶፪። ኢይሠየም፡ ኤጲስ፡ ቆጶስ፡ ዘተጠምቀ፡ ሐዲሰ። ዘመጽአ፡ እምአሕዛብ፡ አው፡ ዘሐይወ፡ በእኩይ፡ ወተጠምቀ፡ ኢመፍትው፡ ይሠየም፡ ኤጲስ፡ ቆጶስ፡ በጊዜሃ። ኢመፍትው፡ ለዘ፡ ኢተመከረ፡ ይኩን፡ መምህረ፡ ለባዕዳን፡ ሰብእ፡ አላ፡ ይኩን፡ ዝንቱ፡ በጸጋ፡ እግዚአብሔር። ወኢይደልዎ፡ ለኤጲስ፡ ቆጶስ፡ ከመ፡ ይንበር፡ ወያስተጋብእ፡ ምርካበ፡ አላ፡ ያስተርክብ፡ ለግብረ፡ ቤተ፡ ክርስቲያን። ወለእመሰ፡ ኢይገብር፡ ኤጲስ፡ ቆጶስና፡ አልቦ፡ ዘይክል፡ ለክልኤ፡ አጋእስት፡ ተቀንዮ፡ በከመ፡ አዘዘ፡ እግዚእነ። ኢንኤዝዝ፡ ከመ፡ ይሠየም፡ ገብር፡ ካህነ፡ ዘእንበለ፡ በመባሕተ፡ አጋእስቲሆሙ፡ ከመ፡ ኢይሕዘኑ፡ አጋእስቲሆሙ፡ እስመ፡ በዝንቱ፡ የሐጽጽ፡ አብያቲሆሙ። ወለእመ፡ ተረክበ፡ ገብር፡ በጊዜሁ፡ ዘይደልዎ፡ መዓርገ፡ ሢመት፡ በከመ፡ አስተርአየ፡ ለነ፡ ወያግዕዝዎ፡ አጋእስቲሁ፡ ወያውፅእዎ፡ እምአብያቲሆሙ፡ ወይሠየም
            </ab>
            </div>
            <div type="textpart" subtype="paragraph" n="53">
               <ab> ትእዛዝ፡ ፶፫። ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ዘይፀመድ፡ ሐራ፡ ወይፈቅድ፡ ይግበሮሙ፡ ለክልኤሆሙ፡ ከመ፡ ይርከብ፡ ሢመተ፡ ሰብእ፡ ወይርከብ፡ ክህነተ፡ ለይሰዐር። እስመ፡ ይቤ፡ ሀቡ፡ ዘእግዚአብሔር፡ ለእግዚአብሔር፡ ወዘንጉሥ፡ ለንጉሥ። ዘያቀልል፡ ንጉሠ፡ አው፡ መኰንነ፡ ዘእንበለ፡ ርቱዕ፡ ይትበቀልዎ፡ ወለእመ፡ ኮነ፡ ካህነ፡ ይስዐር፡ ወለእመ፡ ኮነ፡ ሕዝባዊ፡ ይሰደድ
            </ab>
            </div>
            <div type="textpart" subtype="paragraph" n="54">
               <ab> ትእዛዝ፡ ፶፬። በእንተ፡ ዘከመ፡ ይትወከፉ፡ እመጻሕፍት፡ ዘትካት፡ ወዘሐዲስ፡ ውስተ፡ ቤተ፡ ክርስቲያን። ወይኩኑ፡ እሉ፡ መጻሕፍት፡ ኵሎሙ፡ ኦካህናት፡ ወሕዝባዊያን፡ ቅዱሳን፡ ወክቡራን። ወእሉ፡ እሙንቱ፡ እምሥርዐት፡ ዘትካት
            </ab>
            </div>
            <div type="textpart" subtype="paragraph" n="55">
               <ab> ትእዛዝ፡ ፶፭። መጻሕፍት፡ ዘሙሴ። ዘፍጥረት፡ ዘፀአት፡ ዘሌዋዊያን፡ ዘኍልቍ፡ ዘዳግም፡ ሕግ። ዘኢያሱ፡ ወልደ፡ ነዌ። ዘመሳፍንት። ዘሩት። ፬፡ መጻሕፍት፡ ዘነገሥት። ቀዳሚ፡ ወካልእ፡ ፩። መጻሕፍት፡ ሣልስ፡ ወራብዕ፡ ፩፡ መጽሐፍ። ፪፡ ትራፋተ፡ ነገሥት። ዘዕዝራ፡ ቀዳሚ፡ ወካልእ፡ ፩፡ መጽሐፍ። ዘኢዮብ። ዘአስታር። ዘጦቢት። መክብብ። መዝሙረ፡ ዳዊት፡ ፻፶። ምሳልያተ፡ ሰሎሞን። ዘቤተ፡ ክርስቲያን፡ ዘጉባኤ። መሓልየ፡ መሓልይ። ፲ወ፪፡ ንኡሳን፡ ነቢያት። ኢሳይያስ። ኤርሚያስ። ዳንኤል። ሕዝቅኤል። ወዘንተ፡ መሀሩ፡ ለደቂቅክሙ፡ ዘእንበለ፡ ውእቱ። ጥበበ፡ ሰሎሞን። ዮዲት። መጻሕፍተ፡ ኩፋሌ፡ ፫። ዘኢያሱ፡ ወልደ፡ ሲራክ፡ ዐቢይ፡ ትምህርት። ወመጻሕፍቲነ፡ እሉ፡ ዘሐዲስ፡ ሕግ። ፬፡ ወንጌላት። ዘማቴዎስ። ዘማርቆስ። ዘሉቃስ። ዘዮሐንስ። ወግብረ፡ ሐዋርያት። ፪፡ መልእክት፡ ዘጴጥሮስ። ፫፡ መልእክት፡ ዘዮሐንስ። ፩፡ መልእክት፡ ዘያዕቆብ። ፩፡ ዘይሁዳ። ፲ወ፬፡ መልእክት፡ ዘጳውሎስ። ወአቡ፡ ቀለምሲስ፡ ዘውእቱ፡ አርአያ፡ ዮሐንስ። ፪፡ መልእክተ፡ ቀሌምንጦስ
            </ab>
            </div>
            <div type="textpart" subtype="paragraph" n="56">
               <ab> ትእዛዝ፡ ፶፮። በእንተ፡ ትእዛዘ፡ ሐዋርያት። ወዘንተ፡ ንኤዝዘክሙ፡ ኤጲስ፡ ቆጶሳት፡ በእንተ፡ ሴኖዶስ። እስመ፡ ለእመ፡ ጸናዕክሙ፡ ባቲ፡ ትትባልሑ፡ ወትድኅኑ፡ ወይከውን፡ ለክሙ፡ ሰላመ፡ ለዝሉፉ። ወለእመ፡ ኢተአዘዝክሙ፡ ወኢተወከፍክሙ፡ ዘውስቴቱ፡ ይሳለቀክሙ፡ ወይከውነክሙ፡ ሐዘነ፡ በበይናቲክሙ፡ ለዝሉፉ፡ ወድኅሬሁ፡ ትረክበክሙ፡ ኵነኔ፡ ዘይደልወክሙ፡ በእንተ፡ ዕልወትክሙ። ወእግዚአብሔር፡ ባሕቲቱ፡ ወወልዱ፡ ዋሕድ፡ ኢየሱስ፡ ክርስቶስ፡ ወመንፈስ፡ ቅዱስ፡ ገባሬ፡ ኵሉ፡ ፍጥረት፡ ይረሲክሙ፡ ለለአሐዱ፡ ለኵልክሙ፡ በሰላም፡ ወይርዳእክሙ፡ በኵሉ፡ ኂሩት፡ ወእንዘ፡ ኢታንቀለቅሉ፡ ወተሀልዉ፡ ዘእንበለ፡ ርስሐት፡ እንዘ፡ አልብክሙ፡ ኀጢአተ። ወይረሲክሙ፡ ድልዋነ፡ ለመካነ፡ ሕይወት፡ ዘለዓለም፡ በወልዱ፡ ዘያፈቅር፡ ኢየሱስ፡ ክርስቶስ፡ እግዚእነ፡ ሕያው፡ መድኀኒነ፡ ዘቦቱ፡ ለከ፡ ስብሐት፡ ለአብ፡ ወወልድ፡ ወመንፈስ፡ ቅዱስ። ለዓለመ፡ ዓለም፡ አሜን። ዝንቱ፡ ሴኖዶስ፡ ዘሐዋርያት፡ ዘፈነዉ፡ ምስለ፡ ቀሌምንጦስ። ወስብሐት፡ ለእግዚአብሔር። ለዓለመ፡ ዓለም፡ አሜን።
            </ab>
            </div> 
         </div>
         <listRelation>
            <relation name="saws:isDifferentTo" active="LIT2670AC56" passive="LIT2675AC81"/>
            
            <relation name="saws:hasParent" active="LIT2670AC56" passive="LIT1141Aposto"/>
            <relation name="saws:formsPartOf" active="LIT2670AC56" passive="LIT2317Senodo"></relation>
            <relation name="saws:contains" active="LIT2670AC56" passive="LIT2668AC56Title"></relation>
         </listRelation>
      </body>
   </text>
</TEI>