rgya gar skad du/ A rya many+dzu shrI nA ma sang gi te/ bod skad du/ 'phags pa 'jam dpal gyi mtshan yang dag par brjod pa/
'jam dpal gzhin nur gyur pa la phyag 'tshal lo/ /
de nas dpal ldan rdo rje 'chang/ /
gdul dka' 'dul ba rnams kyi mchog/
dpa' bo 'jig rten gsum las rgyal/ /
rdo rje dbang phyug gsang ba'i rgyal/ /
pad+ma dkar po rgyas 'dra'i spyan/ /
pad+ma rgyas pa'i zhal mnga' ba/ /
rang gi lag gis rdo rje mchog /
yang dang yang du gsor byed pa/ /
khro gnyer rim par ldan la sogs/ /
lag na rdo rje mtha' yas pa/ /
dpa' bo gdul dka' 'dul ba po/ /
'jigs su rung dang dpa' byed can/ /
rdo rje rtse mo rab 'phro ba/ /
rang gi lag gis gsor byed pa/ /
snying rje che dang shes rab dang/ /
thabs kyis 'gro don byed pa'i mchog /
dga' mgu rangs pa'i bsam pa can/ /
khro bo'i lus kyi gzugs ldan pa/ /
sangs rgyas phrin las byed pa'i mgon/ /
lus btud rnams dang lhan cig tu/ /
de bzhin gshegs pa bcom ldan 'das/ /
rdzogs sangs rgyas la phyag 'tshal nas/ /
thal mo sbyar ba byas nas ni/ /
spyan sngar 'dug ste 'di skad gsol/ /
khyab bdag bdag la sman pa dang/ /
bdag don bdag la thugs brtse'i phyir/ /
sgyu 'phrul dra ba'i mngon rdzogs pa'i/ /
byang chub ci nas bdag thob mdzod/ /
nyon mongs pas ni sems dkrugs shing/ /
mi shes 'dam du bying ba yi/ /
sems can kun la sman pa dang / /
bla med 'bras bu thob bya'i phyir/ /
rdzogs pa'i sangs rgyas bcom ldan 'das/ /
'gro ba'i bla ma ston pa po/ /
dam tshig chen po de nyid mkhyen / /
dbang po bsam pa mkhyen mchog gis/ /
bcom ldan 'das kyi ye shes sku/ /
gtsug tor chen po'i tshig gi bdag/ /
ye shes sku ste rang byung ba/ /
'jam dpal ye shes sems dpa' yi/ /
ming ni yang dag brjod pa'i mchog /
don zab don ni rgya che zhing / /
don chen mtshungs med rab zhi ba/ /
thog ma bar dang mthar dge ba/ /
'das pa'i sangs rgyas rnams kyis gsungs/ /
ma 'ongs rnams kyang gsung 'gyur la/ /
da ltar byung ba rdzogs sangs rgyas/ /
yang dang yang du gsungs pa gang / /
rgyud chen sgyu 'phrul dra ba las/ /
rdo rje 'chang chen gsang sngags 'chang/ /
dpag med rnams kyis bga' bzhin du/ /
glur bslangs gang lags bshad du gsol/ /
mgon po rdzogs sangs rgyas kun gyi/ /
gsang 'dzin ci nas bdag 'gyur phyir/ /
nges par 'byung ba'i bar du di/ /
bdag gi bsam pa bstan pos gzung / /
nyon mongs ma lus bsal ba dang / /
mi shes ma lus spangs pa'i phyir/ /
bsam pa'i khyad par ji bzhin du/ /
sems can rnams la bshad par 'tshal/ /
gsang dbang lag na rdo rje yis/ /
de bzhin gshegs la de skad du/ /
gsol nas thal mo sbyar byas te/ /
lus btud nas ni spyan sngar 'dug /
de nas bcom ldan shAkya thub/ /
rdzogs pa'i sangs rgyas rkang gnyis mchog /
nyid kyi zhal nas ljags bzang ba/ /
ring zhing yangs pa brkyang mdzad de/ /
'jig rten gsum po snang mdzad cing/ /
bdud bzhi'i dgra rnams 'dul mdzad pa/ /
sems can rnams kyi ngan song gsum/ /
sbyong bar byed pa'i 'dzum bstan nas/ /
tshangs pa'i gsung ni snyan pa yis/ /
'jig rten gsum po kun bkang nas/ /
lag na rdo rje stobs po che/ /
gsang dbang la ni slar gsungs pa/ /
snying rje che dang ldan gyur pas/ /
'gro la phan'i don du khyod/ /
ye shes lus can 'jam dpal gyi/ /
ming brjod pas ni don che ba/ /
dag par byed cing sdig sel ba/ /
nga las nyan par brtson pa ni/ /
legs so dpal ldan rdo rje 'chang/ /
lag na rdo rje khyod legs so/ /
gsang ba'i bdag po de phyir nges/ /
khyod la legs par bstan par bya/ /
khyod ni rtse gcig yid kyis nyon/ /
bcom ldan de ni legs zhes gsol/ /
de nas bcom ldan shAkya thub/ /
gsang sngags rigs chen thams cad dang/ /
gsang sngags rig sngags 'chang ba'i rigs/ /
rigs gsum la ni rnam par gzigs/ /
'jig rten 'jig rten 'das pa'i rigs/ /
'jig rten snang byed rigs chen dang/ /
phyag rgya chen po'i rigs mchog dang/ /
rigs chen gtsug tor cher gzigs nas/ /
tshig gi bdag pos tshigs su bcad/ /
gsang sngags rgyal po drug ldan zhing/ /
gnyis su med par 'byung ba dang/ /
mi skye chos can 'di gsungs pa/ /
a A/ i I/ u U/ e ai/ o au/ aM aH/ s+thi to hr-i di/ dz+nyAnamU rtir haM bud+d+ho bud+d+hA nAM/ t+r+yad+h+wabrtI nAM/
oM badz+ra tIk+Sh+Na duHkha ts+tshe da/ pradz+nyA dz+nyA na mUr+t+ta ye/ dz+nyA na kA ya/ wA gI shwa ra/ a ra pa tsa nA ya te na maH/
'di ltar sangs rgyas bcom ldan 'das/ /
rdzogs pa'i sangs rgyas a las byung/ /
a ni yig 'bru kun gyi mchog /
don chen yi ge dam pa yin/ /
khong nas 'byung ba skye ba med/ /
tshig tu brjod pa spangs pa ste/ /
brjod pa kun gyi rgyu yi mchog /
tshig kun rab tu gsal bar byed/ /
mchod pa chen po 'dod chags che/ /
sems can thams cad dga' bar byed/ /
mchod pa chen po zhe sdang che/ /
nyon mongs kun gyi dgra che ba/ /
mchod pa chen po gti mug che/ /
gti mug blo ste gti mug sel/ /
mchod pa chen po khro ba che/ /
khro ba chen po dgra che ba/ /
mchod pa chen po chags pa che/ /
chags pa thams cad sel bar byed/ /
'dod pa chen po bde ba che/ /
dga' ba chen po mgu ba che/ /
gzugs che lus kyang che ba ste/ /
kha dog che zhing lus bong che/ /
ming yang che zhing rgya che ba/ /
dkyil 'khor chen po yangs pa yin/ /
shes rab mtshon chen 'chang ba ste/ /
nyon mongs lcags kyu che ba'i mchog /
grags chen snyan grags chen po ste/ /
snang ba chen po gsal ba che/ /
mkhas pa sgyu 'phrul chen po 'chang/ /
sgyu 'phrul chen po don grub pa/ /
sgyu 'phrul chen po dga' bas dga'/ /
sgyu 'phrul chen po mig 'phrul can/ /
sbyin bdag chen po gtso bo ste/ /
tshul khrims chen po 'chang ba'i mchog /
bzod chen 'chang ba brtan pa po/ /
brtson 'grus chen po brtul ba yin/ /
bsam gtan chen po'i ting 'dzin gnas/ /
shes rab chen po lus 'chang ba/ /
stobs po che la thabs che ba/ /
smon lam ye shes rgya mtsho ste/ /
byams chen rang bzhin dpag tu med/ /
snying rje chen po blo yi mchog /
shes rab chen po blo chen ldan/ /
mkhas pa chen po thabs che ba/ /
rdzu 'phrul chen po stobs dang ldan/ /
shugs chen mgyogs pa chen po ste/ /
rdzu 'phrul chen po cher grags pa/ /
stobs chen pha rol gnon pa po/ /
srid pa'i ri bo chen po 'joms/ /
mkhregs shing rdo rje chen po 'chang/ /
drag po chen po drag shul che/ /
'jigs chen 'jigs par byed pa po/ /
mgon po rig mchog chen po ste/ /
bla ma gsang sngags che ba'i mchog /
theg pa chen po'i tshul la gnas/ /
theg pa chen po'i tshul gyi mchog /
sangs rgyas rnam par snang mdzad che/ /
thub pa chen po thub chen ldan/ /
gsang sngags tshul chen las byung ba/ /
gsang sngags tshul chen bdag nyid can/ /
pha rol phyin bcu thob pa ste/ /
pha rol phyin pa bcu la gnas/ /
pha rol phyin bcu dag pa ste/ /
pha rol phyin pa bcu yi tshul/ /
mgon po sa bcu'i dbang phyug ste/ /
sa bcu la ni gnas pa po/ /
shes bcu rnam dag bdag nyid can/ /
shes bcu rnam dag 'chang ba po/ /
rnam pa bcu po don bcu'i don/ /
thub dbang stobs bcu khyab pa'i bdag /
kun gyi don ni ma lus byed/ /
rnam bcu dbang ldan che ba po/ /
thog ma med pa spros med bdag/
de bzhin nyid dag dag pa'i bdag /
bden par sma zhing tshig mi 'gyur/ /
ji skad smras ba de bzhin byed/ /
gnyis med gnyis su med par ston/ /
yang dag mtha' la rnam par gnas/ /
bdag med seng ge'i sgra dang ldan/ /
mu stegs ri dags ngan 'jigs byed/ /
kun tu 'gro ba'i don yod stobs/ /
de bzhin gshegs pa'i yid ltar mgyogs/ /
rgyal ba rnam rgyal dgra las rgyal/ /
'khor los sgyur ba stobs po che/ /
tshogs kyi slob dpon tshogs kyi mchog/ /
tshogs rje tshogs bdag dbang dang ldan/ /
mthu chen gces par 'dzin pa ste/ /
tshul chen gzhan gyis 'dring mi 'jog/ /
tshig rje tshig bdag smra mkhas pa/ /
tshig la dbang ba tshig mtha' yas/ /
tshig bden bden par smra ba ste/ /
bden pa bzhi ni ston pa po/ /
phyir mi ldog pa phyir mi 'ong/ /
'dren pa rang rgyal bse ru'i tshul/ /
nges 'byung sna tshogs las 'byung ba/ /
'byung ba chen po rgyu gcig po/ /
dge slong dgra bcom zag pa zad/ /
'dod chags bral ba dbang po thul/ /
bde ba rnyed pa 'jigs med thob/ /
bsil bar gyur pas rnyog pa med/ /
rig pa dang ni rkang par ldan/ /
bde gshegs 'jig rten rig pa'i mchog /
bdag gir mi 'dzin ngar mi 'dzin/ /
bden pa gnyis kyi tshul la gnas/ /
'khor ba'i pha rol mthar son pa/ /
bya ba byas pa skam sar gnas/ /
ye shes 'ba' zhig las 'byung ba/ /
shes rab mtshon chen rnam 'joms pa/ /
dam chos chos rgyal gsal bar ldan/ /
'jig rten snang bar byed pa'i mchog /
chos kyi dbang phyug chos kyi rgyal/ /
legs pa'i lam ni ston pa po/ /
don grub bsam pa grub pa ste/ /
kun tu rtog pa thams cad spangs/ /
rnam par mi rtog dbyings mi zad/ /
chos dbyings dam pa zad mi shes/ /
bsod nams ldan pa bsod nams tshogs/ /
ye shes ye shes khyad par che/ /
ye shes ldan pa yod med shes/ /
tshogs gnyis tshogs ni bsags pa 'o/ /
rtag pa kun rgyal rnal 'byor can/ /
bsam gtan bsam bya blo ldan bdag /
so so rang rig mi g.yo ba/ /
mchog gi dang po sku gsum 'chang/ /
sangs rgyas sku lnga'i bdag nyid can/ /
khyab bdag ye shes lnga yi bdag /
sangs rgyas lnga bdag cod pan can/ /
spyan lnga chags pa med pa 'chang/ /
sangs rgyas thams cad skyed pa po/ /
sangs rgyas sras po dam pa'i mchog /
shes pa srid 'phyung skye gnas med/ /
chos las byung ba srid pa sel/ /
gcig pu sra mkhregs rdo rje'i bdag /
skyes ma thag tu 'gro ba'i bdag /
nam mkha' las byung rang byung ba/ /
shes rab ye shes me bo che/ /
'od chen rnam par snang bar byed/ /
ye shes skar ma lam me ba/ /
'gro ba'i mar me ye shes sgron/ /
gzi brjid chen po 'od gsal ba/ /
sngags mchog mnga' bdag rig sngags rgyal/ /
gsang sngags rgyal po don chen byed/ /
gtsug tor chen po rmad byung gtsug /
nam mkha'i bdag po sna tshogs ston/ /
sangs rgyas kun kyi sku yi mchog /
'gro ba dga' ba'i mig dang ldan/ /
sna tshogs gzugs can skyed pa po/ /
drang srong ched gus mchod cing brjod/ /
rigs gsum 'chang ba gsang sngags 'chang/ /
dam tshig chen po gsang sngags 'dzin/ /
gtso bo dkon mchog gsum 'dzin pa/ /
theg pa mchog gsum ston pa po/ /
don yod zhags pa rnam par rgyal/ /
'dzin pa chen po rdo rje zhags/ /
rdo rje lcags kyu zhags pa che/ /
rdo rje 'jigs byed 'jigs par byed/ /
khro bo'i rgyal po gdong drug 'jigs/ /
mig drug lag drug stobs dang ldan/ /
keng rus mche ba gtsigs pa po/ /
ha la ha la gdong brgya pa/ /
gzhin rje gshed po bgegs kyi rgyal/ /
rdo rje shugs can 'jigs byed pa/ /
rdo rje grags pa rdo rje snying/ /
sgyu 'phrul rdo rje gsus po che/ /
rdo rje las skyes rdo rje'i bdag/ /
rdo rje snying po mkha' 'dra ba/ /
mi g.yo ral pa gcig gis bsgyings/ /
glang chen ko rlon gos su gyon/ /
drag chen hA hA zhes sgrogs pa/ /
hi hi zhes sgrogs 'jigs par byed/ /
gad mo chen po gad rgyangs can/ /
rdo rje gad mo cher sgrogs pa/ /
rdo rje sems dpa' sems dpa' che/ /
rdo rje rgyal po bde ba che/ /
rdo rje drag po dga' ba che/ /
rdo rje hUM ste hUM zhes sgrogs/ /
mtshon du rdo rje mda' thogs pa/ /
rdo rje ral gris ma lus gcod/ /
rdo rje kun 'chang rdo rje can/ /
rdo rje gcig pu g.yul sel ba/ /
rdo rje 'bar ba mig mi bzad/ /
skra yang rdo rje 'bar ba ste/ /
rdo rje 'bebs pa 'bebs pa che/ /
mig brgya pa ste rdo rje'i mig /
lus ni rdo rje'i ba sbu can/ /
rdo rje'i spu ni gcig pu lus/ /
sen mo skyes pa rdo rje rtse/ /
rdo rje snying po pags pa mkhregs/ /
rdo rje phreng thogs dpal dang ldan/ /
rdo rje rgyan gyis brgyan pa ste/ /
gad rgyangs ha ha nges par sgrogs/ /
yi ge drug pa rdo rje'i sgra/ /
'jam dbyangs chen po sgra che ba/ /
'jig rten gsum gcig sgra gcig pa/ /
nam mkha'i mtha' la sgra sgrogs pa/ /
sgra dang ldan pa rnams kyi mchog /
yang dag bdag med de bzhin nyid/ /
yang dag mtha' ste yi ge med/ /
stong nyid smra ba'i khyu mchog ste/ /
zab cing rgya che sgra sgrogs pa/ /
chos kyi dung ste sgra chen ldan/ /
chos kyi gaN+DI sgra bo che/
mi gnas mya ngan 'das pa po/ /
phyogs bcu chos kyi rnga bo che/ /
gzugs med gzugs bzang dam pa ste/ /
sna tshogs gzugs can yid las skyes/ /
gzugs rnams thams cad snang ba'i dpal/ /
gzugs brnyan ma lus 'chang ba po/ /
tshugs pa med cing che bar grags/ /
khams gsum dbang phyug chen po ste/ /
'phags lam shin tu mtho la gnas/ /
dar ba chen po chos kyi tog /
'jig rten gsum na gzhon lus gcig/ /
gnas brtan rgan po skye dgu'i bdag /
sum cu rtsa gnyis mtshan 'chang ba/ /
sdug gu 'jig rten gsum na mdzes/ /
'jig rten shes legs slob dpon te/ /
'jig rten slob dpon 'jigs pa med/ /
mgon skyob 'jig rten yid gcugs pa/ /
skyabs dang skyob pa bla na med/ /
nam mkha'i mtha' la longs spyod pa/ /
thams cad mkhyen pa'i ye shes mtsho/ /
ma rig sgo nga'i sbubs 'byed pa/ /
srid pa'i dra ba 'joms pa po/ /
nyon mongs ma lus zhi byed pa/ /
'khor ba'i rgya mtsho'i pha rol phyin/ /
ye shes dbang bskur cod pan can/ /
rdzogs pa'i sangs rgyas rgyan du thogs/ /
sdug bsngal gsum gyi sdug bsngal zhi/ /
gsum sel mtha' yas grol gsum thob/ /
sgrib pa thams cad nges par grol/ /
mkha' ltar mnyam pa nyid la gnas/ /
nyon mongs dri ma kun las 'das/ /
dus gsum dus med rtogs pa po/ /
sems can kun gyi gtso bo che/ /
yon tan thod can rnams kyi thod/ /
lus kun las ni rnam grol ba/ /
nam mkha'i lam la rab gnas pa/ /
yid bzhin nor bu chen po 'chang/ /
khyab bdag rin chen kun gyi bdag/ /
dpag bsam shing chen rgyas pa ste/ /
bum pa bzang po che ba'i mchog/ /
byed pa sems can kun don byed/ /
phan 'dogs sems can mnyes gshin pa/ /
bzang ngan shes shing dus shes pa/ /
khyab bdag dam shes dam tshig ldan/ /
dus shes sems can dbang don shes/ /
rnam grol gsum la mkhas pa po/ /
yon tan ldan zhing yon tan shes/ /
chos shes bkra shis bkra shis 'byung/ /
bkra shis kun gyi bkra shis pa/ /
grags pa bkra shis snyan grags dge/ /
dbugs 'byin chen po dga' ston che/ /
dga' chen rol mo chen po ste/ /
bkur sti rim gro phun sum tshogs/ /
mchog tu dga' ba grags bdag dpal/ /
mchog ldan mchog sbyin gtso bo ste/ /
skyabs kyi dam pa skyabs su 'os/ /
'jigs chen dgra ste rab kyi mchog /
'jigs pa ma lus sel ba po/ /
gtsug phud phud bu lcang lo can/ /
ral pa muny+dza cod pan thogs/ /
gdong lnga gtsug phud lnga dang ldan/ /
zur phud lnga pa me tog thod/ /
mgo zlum brtul zhugs chen po 'chang/ /
tshangs par spyod pa brtul zhugs mchog /
dka' thub mthar phyin dka' thub che/ /
gtsang gnas dam pa gau ta ma/ /
bram ze tshangs pa tshangs pa shes/ /
mya ngan 'das pa tshangs pa thob/ /
grol ba thar pa rnam grol lus/ /
rnam grol zhi ba zhi ba nyid/ /
mya ngan 'das zhing mya ngan 'das/ /
legs par mya ngan 'das dang nye/ /
bde sdug sel ba mthar 'gyur pa/ /
chags bral lus las 'das pa po/ /
thub pa med pa dpe med pa/ /
mi mngon mi snang gsal byed min/ /
mi 'gyur kun 'gro khap pa po/ /
phra zhing zag med sa bon bral/ /
rdul med rdul bral dri ma med/ /
nyes pa spangs pa skyon med pa/ /
shin tu sad pa sad pa'i bdag /
kun shes kun rig dam pa po/ /
rnam par shes pa'i chos nyid 'das/ /
ye shes gnyis med tshul 'chang ba/ /
rnam par rtog med lhun gyis grub/ /
dus gsum sangs rgyas las byed pa/ /
sangs rgyas thog ma tha ma med/ /
dang po'i sangs rgyas rgyud med pa/ /
ye shes mi gcig dri ma med/ /
ye shes lus can de bzhin gshegs/ /
tshig gi dbang phyug smra ba che/ /
smra ba'i skyes mchog smra ba'i rgyal/ /
smra ba'i dam pa mchog gi gnas/ /
smra ba'i seng ge tshugs pa med/ /
kun tu lta ba mchog tu dga'/ /
gzi brjid phung po lta na sdug /
'od bzangs 'bar ba dpal kyi be'u/ /
lag na 'od 'bar snang ba po/ /
sman pa che mchog gtso bo ste/ /
zug rngu 'byin pa bla na med/ /
sman rnams ma lus ljon pa'i shing/ /
nad do cog gi dgra che ba/ /
sdug gu 'jig rten gsum gyi mchog /
dpal ldan rgyu skar dkyil 'khor can/ /
phyogs bcu nam mkha'i mthar thug pa/ /
chos kyi rgyal mtshan legs par 'dzugs/ /
'gro ba'i gdugs gcig yangs pa ste/ /
byams dang snying rje'i dkyil 'khor can/ /
dpal ldan pad+ma gar gyi bdag /
khyab bdag chen po rin chen gdugs/ /
sangs rgyas kun gyi gzi brjid che/ /
sangs rgyas kun sku 'chang ba/ /
sangs rgyas kun gyi rnal 'byor che/ /
sangs rgyas kun gyi bstan pa gcig /
rdo rje rin chen dbang bskur dpal/ /
rin chen kun bdag dbang phyug ste/ /
'jig rten dbang phyug kun gyi bdag/
rdo rje 'dzin pa kun gyi rje/ /
sangs rgyas kun gyi thugs che ba/ /
sangs rgyas kun gyi thugs la gnas/ /
sangs rgyas kun gyi sku che ba/ /
sangs rgyas kun gyi gsung yang yin/ /
rdo rje nyi ma snang ba che/ /
rdo rje zla ba dri med 'od/ /
chags bral la sogs chags pa che/ /
kha dog sna tshogs 'bar ba'i 'od/ /
rdo rje skyil krung rdzogs sangs rgyas/ /
sangs rgyas 'gro ba'i chos 'dzin pa/ /
dpal ldan pad+ma sangs rgyas skyes/ /
kun mkhyen ye shes mdzod 'dzin pa/ /
rgyal po sgyu 'phrul sna tshogs 'chang/ /
che ba sangs rgyas rigs sngags rgyal/ /
rdo rje rnon po ral gri che/ /
yi ge mchog ste rnam par dag /
theg pa chen po sdug bsngal gcod/ /
mtshon cha chen po rdo rje chos/ /
rdo rje zab mo dzin na dzik /
rdo rje blo gros don bzhin rig /
pha rol phyin pa kun rdzogs pa/ /
sa rnams kun gyi rgyan dang ldan/ /
rnam par dag pa bdag med chos/ /
yang dag ye shes zla 'od bzang/ /
brtson chen sgyu 'phrul drwa ba ste/ /
rgyud kun gyi ni bdag po mchog /
rdo rje gdan ni ma lus ldan/ /
ye shes sku rnams ma lus 'chang/ /
kun tu bzang po blo gros bzang/ /
sa yi snying po 'gro ba 'dzin/ /
sangs rgyas kun gyi snying po che/ /
sprul pa'i 'khor lo sna tshogs 'chang/ /
dngos po kun gyi rang bzhin mchog /
dngos po kun gyi rang bzhin 'dzin/ /
skye med chos te sna tshogs don/ /
chos kun ngo bo nyid 'chang ba/ /
shes rab chen po skad cig la/ /
chos kun khong du chud pa 'chang/ /
chos kun mngon par rtogs pa ste/ /
thub pa blo mchog 'byung po sel/ /
mi g.yo rab tu dang ba'i bdag /
rdzogs pa'i sangs rgas byang chub 'chang/ /
sangs rgyas kun gyi mngon sum pa/ /
ye shes me lce 'od rab gsal/ /
'dod pa'i don sgrub dam pa ste/ /
ngan song thams cad rnam sbyong ba/ /
mgon po sems can kun gyi mchog /
sems can thams cad rab grol byed/ /
nyon mongs g.yul du gcig dpa' ba/ /
mi shes dgra yi dregs pa 'joms/ /
dpal ldan blo dang sgegs par ldan/ /
bstan po mi sdug gzugs 'chang ba/ /
lag pa brgya po kun bskyod cing/ /
goms pa'i stabs kyis gar byed pa/ /
dpal ldan lag pa brgyas gang la/ /
nam mkha' khyab par gar byed pa/ /
sa'i dkyil 'khor gzhi'i khyon/ /
rkang pa ya gcig mthil gyis gnon/ /
rkang thebs sen mo'i khyon gyis kyang/ /
tshangs pa'i yul sa rtse nas gnon/ /
don gcig gnyis med chos kyi don/ /
dam pa'i don de 'jig pa med/ /
rnam rig sna tshogs gzugs don can/ /
rnam shes tshogs pa rgyud dang ldan/ /
dngos don ma lus rnams la dga'/ /
stong pa nyid dga' 'dod chags blo/ /
srid pa'i 'dod chags sogs spangs pa/ /
srid gsum dga' ba chen po pa/ /
sprin dkar dag pa bzhin du dkar/ /
'od bzangs ston ka'i zla ba'i 'od/ /
nyi ma 'char ka'i dkyil ltar mdzes/ /
sen mo'i 'od ni shes cher dmar/ /
cod pan bzang po mthon ka'i rtse/ /
skra mchog mthon ka chen po 'chang/ /
nor bu chen po 'od chags dpal/ /
sangs rgyas sprul pa'i rgyan dang ldan/ /
'jig rten khams brgya kun bskyod pa/ /
rdzu 'phrul rkang pa'i stobs chen ldan/ /
de nyid dran pa chen po 'chang/ /
dran pa bzhi po ting 'dzin rgyal/ /
byang chub yan lag me tog spos/ /
de bzhin gshegs pa'i yon tan mtsho/ /
lam gyi yan lag brgyad tshul rig /
yang dag sangs rgyas lam rig pa/ /
sems can kun la shas cher chags/ /
nam mkha' lta bur chags pa med/ /
sems can kun gyi yid la 'jug/ /
sems can kun gyi yid ltar mgyogs/ /
sems can kun gyi dbang don shes/ /
sems can kun gyi yid 'phrog pa/ /
phung po lnga don de nyid shes/ /
rnam dag phung po lnga 'chang ba/ /
nges 'byung kun gyi mtha' la gnas/ /
nges par 'byung ba kun la mkhas/ /
nges 'bhung kun gyi lam la gnas/ /
nges par 'byung ba kun ston pa/ /
yan lag bcu gnyis srid rtsa bton/ /
dag pa rnam pa bcu gnyis 'chang/ /
bden bzhi'i tshul gyi rnam pa can/ /
shes pa brgyad po rtogs pa 'chang/ /
bden don rnam pa bcu gnyis ldan/ /
de nyid rnam pa bcu drug rig /
rnam pa nyi shus byang chub pa/ /
rnam par sangs rgyas kun rig mchog /
sangs rgyas kun gyi sprul pa'i sku/ /
bye ba dpag med 'gyed pa po/ /
skad cig thams cad mngon par rtogs/ /
sems kyi skad cig don kun rig /
theg pa sna tshogs thabs tshul gyis/ /
'gro ba'i don la ston pa po/ /
theg pa gsum gyi nges 'byung la/ /
theg pa gcig gi 'bras bur gnas/ /
nyon mongs khams rnams dag pa'i bdag /
las kyi khams rnams zad byed pa/ /
chu bo rgya mtsho kun las rgal/ /
sbyor ba'i dgon pa las byung ba/ /
nyon mongs nye ba kun nyon mongs/ /
bag chags bcas pa gtan spangs pa/ /
snying rje chen po shes rab thabs/ /
don yod 'gro ba'i don byed pa/ /
'du shes kun gyi don spangs shing/ /
rnam shes don ni 'gag par byed/ /
sems can kun gyi yid dang ldan/ /
sangs rgyas kun gyi thugs rig pa/ /
sems can kun gyi yid la gnas/ /
de dag sems dang mthun par 'jug /
sems can kun yid tshim par byed/ /
sems can kun gyi yid dga' ba/ /
grub pa mthar phyin 'khrul pa med/ /
nor ba thams cad rnam par spangs/ /
don gsum the tshom med pa'i blo/ /
kun don yon tan gsum gyi bdag /
phung po lnga don dus gsum du/ /
skad cig thams cad bye brag byed/ /
skad cig gcig gis rdzogs sangs rgyas/ /
sangs rgyas kun gyi rang bzhin 'chang/ /
lus med lus te lus kyi mchog /
lus kyi mtha' ni rtogs pa po/ /
gzugs rnams sna tshogs kun tu ston/ /
nor bu chen po rin chen tog /
sangs rgyas kun gyis rtogs bya ba/ /
sangs rgyas byang chub bla na med/ /
gsang sngags las byung yi ge med/ /
gsang sngags chen po rigs gsum pa/ /
gsang sngags don kun skyed pa po/ /
thig le chen po yi ge med/ /
stong pa chen po yi ge lnga/ /
thig le stong pa yi ge brgya /
rnam pa kun ldan rnam pa med/ /
bcu drug phyed phyed thig le can/ /
yan lag med pa'i rtsis las 'das/ /
bsam gtan bzhi pa'i rtse mo can/ /
bsam gtan yan lag kun shes shing/ /
ting 'dzin rigs dang rgyud rig pa/ /
ting 'dzin lus can lus kyi mchog /
longs spyod rdzogs sku kun gyi rgyal/ /
sprul pa'i sku ste sku yi mchog /
sangs rgyas sprul pa'i rgyud 'chang ba/ /
phyogs bcur sprul pa sna tshogs 'gyed/ /
ji bzhin 'gro ba'i don byed pa/ /
lha yi dbang po lha yi lha/ /
lha yi bdag po lha min bdag /
'chi med dbang po lha yi bla/ /
'joms byed 'joms byed dbang phyug po/ /
srid pa'i dgon pa las rgal ba/ /
ston pa gcig pu 'gro ba'i bla/ /
'jig rten phyogs bcur rab grags pa/ /
chos kyi sbyin bdag che ba po/ /
byams pa'i go cha chas pa ste/ /
snying rje yi ni ya lad bgos/ /
shes rab ral gri mda' gzhu thogs/ /
nyon mongs mi shes g.yul ngo sel/ /
dpa' bo bdud dgra bdud 'dul ba/ /
bdud bzhi'i 'jigs pa sel bar byed/ /
bdud kyi dpung rnams pham byed pa/ /
rdzogs pa'i sangs rgyas 'jig rten 'dren/ /
mchod 'os bstod 'os phyag gi gnas/ /
rtag tu rim gro bya ba'i 'os/ /
bkur 'os rjed bar bya ba'i 'os/ /
phyag byar 'os pa bla ma'i rab/ /
'jig rten gsum po gom gcig bgrod/ /
mkha' ltar mtha' med rnam par gnon/ /
gsum rig gtsang ma dag pa ste/ /
mngon shes drug ldan rjes dran drug /
byang chub sems dpa' sems dpa' che/ /
rdzu 'phrul chen po 'jig rten 'das/ /
shes rab pha rol phyin pa'i mtha'/ /
shes rab kyis ni de nyid thob/ /
bdag rig gzhan rig thams cad pa/ /
kun la phan pa'i gang zag mchog /
dper bya kun las 'das pa ste/ /
shes dang shes bya'i bdag po mchog /
gtso bo chos kyi sbyin bdag ste/ /
phyag rgya bzhi po don ston pa/ /
'gro ba'i bsnyen bkur gnas kyi mchog /
nges 'byung gsum po bgrod rnams kyi/ /
don gyi dam pa rnam dag dpal/ /
'jig rten gsum na skal bzang che/ /
dpal ldan 'byor pa kun byed pa/ /
'jam dpal dpal dang ldan pa'i mchog/
mchog sbyin rdo rje mchog khyod 'dud/ /
yang dag mthar gyur khyod la 'dud/ /
stong nyid las byung khyod la 'dud/ /
sangs rgyas byang chub khyod la 'dud/ /
sangs rgyas chags pa khyod la 'dud/ /
sangs rgyas 'dod la phyag 'tshal 'dud/ /
sangs rgyas dgyes pa khyod la 'dud/ /
sangs rgyas rol la phyag 'tshal 'dud/ /
sangs rgyas 'dzum pa khyod la 'dud/ /
sangs rgyas bzhad la phyag 'tshal 'dud/ /
sangs rgyas gsung nyid khyod la 'dud/ /
sangs rgyas thugs la phyag 'tshal 'dud/ /
med pa las byung khyod la 'dud/ /
sangs rgyas 'byung ba khyod la 'dud/ /
nam mkha' las byung khyod la 'dud/ /
ye shes las byung khyod la 'dud/ /
sgyu 'phrul dra ba khyod la 'dud/ /
sangs rgyas rol ston khyod la 'dud/ /
thams cad thams cad khyod la 'dud/ /
ye shes sku khyod la 'dud do/ /
oM sar+b+ba d+har+m+mA b+hA ba swa b+hA wa bi shud+d+ha badz+ra tsak+ShuHa AHaM aHpra krI ti/ pa ri shud+d+haHsar+b+ba d+har+m+mA ya du ta sar+b+ba ta thA ga ta dz+nyA na kA ya/ many+dzu shrI pa ri shud+d+hi tA/ mu pA dA ye ti/ a AH/ sar+b+ba ta thA ga ta hrI da ya/ ha ra ha ra/ auM hUM hrIHb+ha ga bAn dz+nyA na mUrti/ bA gI shwa ra/ ma hA pA tsa/ sar+b+ba d+har+m+mA ga ga nA ma la su pa ri shud+d+ha/ d+har+m+mA d+hA tu dz+nyA na gar+b+ha AH/
de nas dpal ldan rdo rje 'chang/ /
dga' zhing mgu nas thal mo sbyar/ /
mgon po bcom ldan de bzhin gshegs/ /
rdzogs sangs rgyas la phyag 'tshal nas/ /
de ni mgon po gsang ba'i bdag /
lag na rdo rje khro bo'i rgyal/ /
sna tshog gzhan dang lhan cig tu/ /
gsang bstod nas ni tshig 'di gsol/ /
mgon po bdag cag yi rang ngo/ /
legs so legs so legs par gsungs/ /
rnam grol 'bras bu 'tshal ba yi/ /
'gro ba'i mgon med rnams dang ni/ /
bdag cag yang dag rdzog pa yi/ /
byang chub thob pa'i don chen mdzad/ /
sgyu 'phrul dra ba'i tshul bstan pa/ /
'di ni rnam dag legs pa'i lam/ /
zab cing yangs la rgya che ste/ /
don chen 'gro ba'i don byed pa/ /
sangs rgyas rnams kyi yul 'di ni/ /
rdzogs pa'i sangs rgyas kun gyis bshad/ /
'phags pa rnal 'byor chen po'i rgyud sgyu 'phrul dra ba stong phrag bcu drug pa ting nge 'dzin dra ba'i le'u las phyung ba/ bcom ldan 'das 'jam dpal ye shes sems dpa'i don dam pa'i mtshan yang dag par brjod pa/ bcom ldan 'das de bzhin gshegs pa shAkya thub pas gsungs pa rdzogs so// //