technical_wikipedia

അച്ചടിയെ വിപ്ലവകരമാക്കിയ ജർമൻ പ്രിന്ററാണ് ജോഹന്ന്സ് ജെൻസ്ഫ്ലൈഷ് ലേഡൻ സം ഗുട്ടെൻബെർഗ് ഉദ്ദേശം 1398-1468 ഫെബ്രുവരി 3). ജംഗമാച്ചുകൾ (movable metal types) ഉപയോഗിച്ചുകൊണ്ടുള്ള അച്ചടി കണ്ടുപിടിച്ചത് ഗുട്ടൻബെർഗാണ്. ലോകത്തെ മാറ്റിമറിച്ച കണ്ടെത്തലായിരുന്നു ഇത്. ചൈനക്കാർ മരഅച്ചുകൾകൊണ്ട് അച്ചടി നടത്തയിരുന്നുവെങ്കിലും ഗുട്ടെൻബെർഗിന്റെ സങ്കേതത്തിലൂടെയാണ് അച്ചടി ലോകവ്യാപകമായത്. കൊല്ലൻ, സ്വർണ്ണപ്പണിക്കാരൻ, പ്രിന്റർ, പ്രസാധകൻ എന്നീ നിലകളിൽ ഇദ്ദേഹം ജോലി ചെയ്തിട്ടുണ്ട്.

ഇദ്ദേഹമാണ് യൂറോപ്പിൽ അച്ചടി കൊണ്ടുവന്നത്. ഇത് പ്രിന്റിംഗ് വിപ്ലവത്തിന് വഴിതെളിച്ചു. ഇതാണ് ആധുനിക കാലഘട്ടത്തിലെ ഏറ്റവും പ്രധാന സംഭവവികാസം എന്ന് കണക്കാക്കപ്പെടുന്നു. നവോദ്ധാരണത്തിനും, പ്രൊട്ടസ്റ്റന്റ് നവീകരണത്തിനും, ജ്ഞാനോദയകാലത്തിനും, ശാസ്ത്രീയ വിപ്ലവത്തിനും ഈ കണ്ടുപിടുത്തം വഴിവച്ചു. അറിവിനെ ആസ്പദമാക്കിയുള്ള സമ്പദ് വ്യവസ്ഥയ്ക്കും അറിവിന്റെ ജനാധിപത്യവൽക്കരണത്തിനും അടിസ്ഥാനശിലയായത് അച്ചടിയാണ്. ലോക ചരിത്രത്തെ ഏറ്റവും സ്വാധീനിച്ച നൂറു വ്യക്തികളുടെ ഹ്രസ്വ ചരിത്രമാണ് ദ ഹന്ഡ്രഡ് എന്ന പേരിൽ മൈക്കിൾ ഹാർട്ട് 1978ൽ പ്രസിദ്ധീകരിച്ച പുസ്തകം . ഈ പട്ടികയിലെ 8ആം സ്ഥാനത്തുള്ളത് ഗുട്ടൻബെർഗാണ്.

മാറ്റി ഉപയോഗിക്കാവുന്ന അച്ച് ഉപയോഗിച്ച് അച്ചടി നടത്തിയ ആദ്യയൂറോപ്യനാണ് ഗുട്ടൻബർഗ്. ഉദ്ദേശം 1439ലാണ് ഇതിന്റെ ആരംഭം. മാറ്റി ഉപയോഗിക്കാവുന്ന അക്ഷരങ്ങളുടെ അച്ചുകൾ ഒരുമിച്ച് ധാരാളമായി ഉണ്ടാക്കുക; എണ്ണയിൽ ലയിപ്പിച്ച മഷി ഉപയോഗിക്കുക; മരം കൊണ്ടുണ്ടാക്കിയ ചട്ടക്കൂടുകൾ അച്ചടിക്കായി ഉപയോഗിക്കുക എന്നിവയായിരുന്നു ഇദ്ദേഹത്തിന്റെ കണ്ടുപിടുത്തങ്ങൾ. ഈ മൂന്നു സംവിധാനങ്ങളും ഒരുമിച്ചു ചേർത്ത് അച്ചടിച്ച പുസ്തകങ്ങൾ വ്യാവസായികാടിസ്ഥാനത്തിൽ പുറത്തിറക്കുക എന്നതായിരുന്നു ലോകചരിത്രത്തെ മാറ്റിമറിച്ച സംഭവം. ഈ സംവിധാനം പുസ്തകമിറക്കൽ അച്ചടിക്കാർക്കും വായനക്കാർക്കും ഒരുപോലെ ലാഭകരമായ ഏർപ്പാടാക്കി മാറ്റി. അച്ചിനായുള്ള പ്രത്യേക ലോഹക്കൂട്ടും കൈകൊണ്ടുപയോഗിക്കാവുന്ന മൂശയും ഉപയോഗിച്ചാണ് ഇദ്ദേഹം അച്ചുകൾ ഉണ്ടാക്കിയതെന്ന് കരുതപ്പെടുന്നു.

യൂറോപ്പിൽ ഗുട്ടൻബർഗിന്റെ കണ്ടുപിടുത്തത്തിനു മുൻപ് പുസ്തകങ്ങൾ കൈകൊണ്ട് എഴുതിയായിരുന്നു തയ്യാറാക്കിയിരുന്നത്. ചിലപ്പോൾ മരത്തിൽ കൊത്തിയെടുക്കുന്ന അച്ചുപയോഗിച്ചും പുസ്തകങ്ങൾ അച്ചടിക്കപ്പെട്ടിരുന്നു. യൂറോപ്പിലെ പുസ്തകപ്രസാധനരംഗത്ത് വിപ്ലവകരമായ മാറ്റമാണ് ഈ കണ്ടുപിടുത്തം കാരണമുണ്ടായത്. ഈ സാങ്കേതികവിദ്യ യൂറോപ്പിലാകമാനം അതിവേഗം പടർന്നു. പിന്നീട് ഇത് ലോകമാസകലം വ്യാപിക്കുകയും ചെയ്തു.

ഇദ്ദേഹം ഗുട്ടൻബർഗ് ബൈബിളിന്റെ (42 ലൈൻ ബൈബിൾ എന്നും ഇതറിയപ്പെടുന്നു) സൃഷ്ടാവ് എന്ന നിലയിലും അറിയപ്പെടുന്നുണ്ട്. സാങ്കേതികവിദ്യ, കലാചാരുത എന്നീ കാരണങ്ങളാൽ ഈ ബൈബിൾ വിശ്രുതമാണ്
നിശ്ചിതമായ ഒന്നോ അതിലധികമോ ജോലികൾ ചെയ്യുവാനുപയോഗിക്കുന്ന കമ്പ്യൂട്ടർ സംവിധാനങ്ങളെയാണ് എംബഡഡ് സിസ്റ്റങ്ങൾ എന്നു വിളിക്കുന്നത്. മിക്കപ്പോഴും റിയൽ-ടൈം വിവരങ്ങളെ സ്വീകരിച്ച് യഥസമയം പ്രതികരിക്കുവാനുള്ള ജോലികളാണ് ഇവയ്ക്ക് നൽകപ്പെടുക. നേരേ മറിച്ച് സാധാരണ വിവിധാവശ്യ കമ്പ്യൂട്ടറുകൾ, ആവശ്യത്തിനുള്ള സോഫ്റ്റ്വെയർ ഇൻസ്റ്റാൾ ചെയ്ത് ഉപഭോക്താവിന്റെ അസംഖ്യം ആവശ്യങ്ങൾക്ക് വേണ്ടി ഉപയോഗിക്കാം. ഇന്ന് നാം കൈകാര്യം ചെയ്യുന്ന അനവധി ഉപകരണങ്ങളിൽ എംബഡഡ് സിസ്റ്റങ്ങൾ ഉപയോഗിക്കുന്നു. മൈക്രോകൺട്രോളർ, മൈക്രോപ്രൊസസ്സർ, ഡിജിറ്റൽ സിഗ്നൽ പ്രൊസസ്സർ മുതലായവയാണ് ഇവ നിയന്ത്രിക്കാൻ ഉപയോഗിക്കുന്നത്.
എംബഡഡ് സിസ്റ്റങ്ങളുടെ ഉപയോഗത്തിന് അനവധി ഉദാഹരണങ്ങളുണ്ട്. വിദൂര ആശയവിനിമയത്തിൽ അനവധി എംബഡഡ് സിസ്റ്റങ്ങൾ ഉപയോഗിക്കുന്നു. ടെലിഫോൺ ശൃംഖലയിൽ ഉപയോഗിക്കുന്ന ടെലിഫോൺ സ്വിച്ചുകൾ മുതൽ സാധാരണക്കാരന്റെ കയ്യിലെ മൊബൈൽ ഫോൺ വരെ എംബഡഡ് സിസ്റ്റങ്ങൾക്ക് ഉദാഹരണങ്ങളാണ്. കമ്പ്യൂട്ടർ ശൃംഖലകളിൽ റൗട്ടറുകളും ബ്രിഡ്ജുകളും ഉപയോഗിക്കുന്നു.

എം.പി.ത്രീ. പ്ലെയറുകൾ ‍, പേഴ്സണൽ ഡിജിറ്റൽ അസിസ്റ്റന്റുകൾ‍, മൊബൈൽ ഫോണുകൾ , വീഡിയോ ഗെയിമുകൾ‍, ഡിജിറ്റൽ ക്യാമറകൾ, ജി.പി.എസ്. സ്വീകരണികൾ, വീട്ടുപകരണങ്ങളായ അലക്കുയന്ത്രം, മൈക്രോ വേവ് ഓവനുകൾ മുതാലായവയെല്ലാം എംബെഡെഡ് സിസ്റ്റങ്ങൾ ഉപയോഗിക്കുന്നവയോ എംബഡഡ് സിസ്റ്റങ്ങൾ തന്നെയോ ആണ്.

ഗതാഗത്തിനുപയോഗിക്കുന്ന വിമാനം മുതൽ സാധാരണ നിരത്തിലോടുന്ന വാഹനങ്ങളിൽ വരെ എംബഡഡ് സംവിധാനങ്ങൾ ഉപയോഗിക്കുന്നു. ഇന്നത്തെ വിമാനങ്ങളിൽ ഇനേർഷ്യൽ ഗയിഡൻസ് സംവിധാനങ്ങൾ, ജി.പി.എസ്. സ്വീകരണികൾ മുതലായ സജ്ജീകരണങ്ങൾ സുരക്ഷിതത്വം ഉറപ്പു വരുത്തുന്നു. ബ്രഷ് ലെസ്സ് ഡി.സി. മോട്ടോറുകൾ, ഇൻഡക്ഷൻ മോട്ടോറുകൾ, മറ്റു ഡി.സി. മോട്ടോറുകൾ മുതലായവ ഇലക്ടോണിക് മോട്ടോർ നിയന്ത്രണ സംവിധാനങ്ങൾ ഉപയോഗിക്കുന്നുണ്ട്. സാധാരണ വാഹനങ്ങൾ, വൈദ്യുത വാഹനങ്ങൾ, ഹൈബ്രിഡ് വാഹനങ്ങൾ എന്നിവയിൽ മലിനീകരണം നിയന്ത്രിക്കുന്നതിനും, കാര്യക്ഷമത വർദ്ദിപ്പിക്കുന്നതിനും എംബഡഡ് സംവിധാനങ്ങൾ ഉപയോഗിക്കുന്നു. വാഹനങ്ങളിൽ ഉപയോഗിക്കുന്ന മറ്റ് സംവിധാനങ്ങൾ ആന്റി ബ്രേക്കിങ്ങ് സംവിധാനം, 4 വീൽ ഡ്രൈവ്, ഓട്ടോമാറ്റിക് ട്രാക്ഷൻ നിയന്ത്രണം മുതലായവയാണ്.

ഇ.സി.ജി.,ഇ.ഇ.ജി.,ഇലക്ട്രോണിക് സ്പന്ദമാപിനകൾ തുടങ്ങിയ വൈദ്യോപകരണങ്ങളിൽ തരംഗങ്ങളുടെ ഉച്ചത വർദ്ധിപ്പിക്കുന്നതിനും റെക്കോർഡ് ചെയ്തു വയ്ക്കുന്നതിനും എംബഡഡ് സംവിധാനങ്ങൾ ഉപയോഗിക്കുന്നു. സി.ടി. സ്കാൻ, എം.ആർ.ഐ. സ്കാൻ മുതലായ ഇമേജിങ്ങ് സംവിധാനങ്ങളും കാർഡിയാക് പേസ് മേക്കർ പോലുള്ള അനവധി റിയൽ ടൈം എംബഡഡ് സംവിധാനങ്ങളും വൈദ്യശാസ്ത്ര രംഗത്ത് ഉപയോഗിക്കുന്നുണ്ട്.

    അനവധി ജോലികൾ ചെയ്യാൻ കഴിവുള്ള സാധാരണ വിവിധാവശ്യ കമ്പ്യൂട്ടറുകളിൽ നിന്നും വിപരീതമായി എംബഡഡ് സംവിധാനങ്ങൾ രൂപകല്പന ചെയ്തിരിക്കുന്നത് നിശ്ചിതമായ ജോലികൾ ചെയ്യുന്നതിനു വേണ്ടിയായിരിക്കും. ചില എംബഡഡ് സംവിധാനങ്ങൾ റിയൽ ടൈം ജോലികൾ നിർവഹിക്കുവാൻ വേണ്ടിയുള്ളതായിരിക്കും. ചിലവയാകട്ടെ യന്ത്രഭാഗങ്ങളുടെ സങ്കീർണ്ണത കുറക്കാൻ വേണ്ടിയുള്ളതായിരിക്കും.
    എംബഡഡ് സംവിധാനങ്ങൾ എപ്പോഴും സ്വതന്ത്രമായി ഒറ്റക്ക് നിലനിൽക്കുന്നതും പ്രവർത്തിക്കുന്നതും ആയിരിക്കണമെന്നില്ല. മറ്റേതെങ്കിലും ജോലി ചെയ്യുന്ന ഒരു ഉപകരണത്തിന്റെ ഭാഗമായി പ്രവർത്തിക്കുന്ന എംബഡഡ് സംവിധാനങ്ങളും ഉണ്ട്. ഉദാഹരണത്തിന് ഗ്ഗിബ്സൺ റോബോട്ട് ഗിത്താറിൽ ഉപയോഗിക്കുന്ന ഒരു എംബഡഡ് സംവിധാനം ചെയ്യുന്നത് ഗിത്താറിന്റെ ശ്രുതി ക്രമപ്പെടുത്തുക എന്ന ജോലിയാണ്. എന്നാൽ സംഗീതം പുറപ്പെടുവിക്കുക എന്നതാണല്ലോ ഗിത്താർ എന്ന ഉപകരണം ചെയ്യുന്ന ജോലി. അതു പോലെ തന്നെ വാഹനങ്ങളിൽ ഉപയോഗിക്കുന്ന എംബഡഡ് സംവിധാനങ്ങൾ ചെറിയ ജോലികൾ ചെയ്യുന്ന ഉപ സംവിധാനങ്ങൾ ആയിരിക്കും.
    എംബഡഡ് സംവിധാനങ്ങളിലെ പ്രോഗ്രാമുകളെ ഫേംവേറുകൾ(firmware) എന്നാണ് വിളിക്കുക. റോമുകളിലോ ഫ്ലാഷ് മെമ്മറികളിലോ ആയിരിക്കും ഇവ സൂക്ഷിക്കുക. എംബഡഡ് സംവിധാനങ്ങൾക്ക് വളരെ ക്ലിപ്തമായ ഹാർഡ് വെയറുകളേ ഉണ്ടാകൂ. പ്രദർശിനി, കീബോർഡ് മുതലായവ ചിലപ്പോൾ മാത്രമേ ഉണ്ടാകൂ. ഉണ്ടെങ്കിൽ തന്നെ മിക്കവാറും ചെറുതായിരിക്കും. അതു പോലെ തന്നെ വളരെ കുറച്ച് മാത്രം മെമ്മറിയേ ഇവക്കുണ്ടാകൂ.
ശാസ്ത്രീയമായ അറിവുകൾ പ്രയോഗിച്ചും പ്രകൃതിനിയമങ്ങൾ, ഭൗതിക സ്രോതസ്സുകൾ തുടങ്ങിയവ പ്രയോജനപ്പെടുത്തിയും പ്രത്യേക വസ്തുതകൾക്കും മാനദണ്ഡങ്ങൾക്കും അനുസൃതമായി രൂപഘടനകൾ, യന്ത്രങ്ങൾ, ഉപകരണങ്ങൾ, വ്യൂഹങ്ങൾ മുതലായവയുടെ നിർമ്മാണം സാധ്യമാക്കുന്ന തൊഴിൽ രീതിയെയാണ് പൊതുവെ എൻജിനീയറിങ്ങ് എന്ന് പറയുന്നത്.

എൻജിനീയറിങ്ങ് നടപ്പിൽ വരുത്തുന്ന അല്ലെങ്കിൽ അത് തൊഴിലായി സ്വീകരിച്ച വ്യക്തിയെ എഞ്ചിനീയർ എന്നു പറയുന്നു. വളരെ വികാസം പ്രാപിച്ച ഒരു മേഖലയാണ്‌ എൻജിനീയറിങ്ങ്. എൻജിനീയറിങ്ങിനു കുറേയധികം ഉപവിഭാഗങ്ങൾ ഉണ്ട്. ഒരോ ഉപവിഭാഗവും ഒരു പ്രത്യേക പ്രായോഗിക മേഖലയിൽ അതുമായി ബന്ധപ്പെട്ട സങ്കേതികവിദ്യയുമായി ആഴത്തിൽ വർത്തിക്കുകയും ചെയ്യുന്നു.
കപ്പി, ഉത്തോലകം, ചക്രം തുടങ്ങിയ അടിസ്ഥാനപരമായ കണ്ടുപിടിത്തങ്ങൾ മുതൽക്കേ മനുഷ്യൻ എൻജിനീയറിങ് തത്ത്വങ്ങൾ പ്രയോഗിച്ചിരുന്നു എന്ന് കാണാം. ഉപയോഗപ്രദമായ ഉപകരണങ്ങളെ സൃഷ്ടിച്ച ഈ ഒരോ കണ്ടുപിടിത്തവും എൻജിനീയറിങ്ങിന്റെ ആധുനീക നിർവ്വചനങ്ങൾക്കനുസൃതമാണ്‌ എന്ന് മനസ്സിലാക്കാവുന്നതാണ്‌.

എൻജിനീയറിങ് (engineering) എന്ന പദത്തിന്‌ അത്ര വലിയ പ്രായമില്ല. എൻജിനിയർ (engineer) എന്ന പദത്തിൽ നിന്നാണ്‌ ഈ വാക്കിൽ നിന്ന് ഉരുത്തിരിഞ്ഞ് വന്നതാണ്‌ ഈ പദം, 1325 മുതലുള്ള എൻജിനീയർ എന്ന വാക്ക് സൈനിക യന്ത്രോപകരണങ്ങൾ (engines) നിർമ്മിക്കുന്ന ആളെ സൂചിപ്പിക്കുവാനായിരുന്നു ഉപയോഗിച്ചിരുന്നത്, എൻജിൻ എന്ന വാക്ക് അക്കാലത്ത് സൈനിക യന്ത്രങ്ങളെ (military engines) ഉദ്ദേശിച്ചായിരുന്നു ഉപയോഗിച്ചിരുന്നത്. "നൈസർഗ്ഗികമായ കഴിവ്, ബുദ്ധിപരമായ കണ്ടുപിടിത്തം" എന്നർത്ഥം വരുന്ന ഇൻജെനിയം (ingenium) എന്ന ലാറ്റിൻ പദത്തിൽ നിന്നാണ്‌ എൻജിൻ എന്ന വാക്ക് ഉണ്ടായത്.

ശേഷം കെട്ടിടങ്ങൾ പാലങ്ങൾ തുടങ്ങിയവയുടെ രൂപകൽപ്പന പ്രത്യേക വൈദഗ്ദ്ധ്യ വിഭാഗമായി വികസിച്ചതോടെ സിവിൽ എൻജിനിയറിങ് എന്ന വാക്ക് സൈനികപരമല്ലാത്ത സൃഷ്ടികളെ സൂചിപ്പിക്കുവാൻ ഉപയോഗിച്ച് തുടങ്ങി.
ശാസ്ത്രത്തെപ്പോലെ തന്നെ എൻജിനീയറിങ്ങും വിശാലമായ മേഖലയാണ്‌, അതുകൊണ്ട് തന്നെ ഇതിനെ പല ഉപവിഭാഗങ്ങളായി തിരിച്ചിട്ടുണ്ട്. ഓരോ വിഭാഗവും എൻജിനീയറിങ്ങിലെ പ്രത്യേക മേഖലയിൽ വർത്തിക്കുന്നു. തുടക്കത്തിൽ ഒരോ എൻജിനീയറും പ്രത്യേക മേഖലയിലായിരിക്കും പരിശീലനം നേടുന്നത്, പക്ഷെ ഒരു എൻജിനീയർ അയാളുടെ തൊഴിൽജീവിതത്തിൽ മറ്റു മേഖലകളിൽക്കൂടി പ്രവർത്തിക്കേണ്ടി വരാറുണ്ട്. എൻജിനീയറിങ്ങിലെ പ്രധാനപ്പെട്ട വിഭാഗങ്ങൾ ഇവയാണ്‌.

    എയറോസ്പേസ് എൻജിനീയറിങ്ങ്
    കെമിക്കൽ എൻജിനീയറിങ്ങ്
    സിവിൽ എൻജിനീയറിങ്ങ്
    ഇലക്ട്രിക്കൽ എൻജിനീയറിങ്ങ്
    മെക്കാനിക്കൽ എൻജിനീയറിങ്ങ്
    ഇലക്ട്രോണിക്സ് എൻജിനീയറിങ്ങ്

സാങ്കേതിക വിദ്യയുടെ വർദ്ധിച്ച മുന്നേറ്റത്തോടെ എൻജിനീയറിങ്ങ് പുതിയ മേഖലകളിലേക്ക് വികസിക്കുകയും പുതിയ വിഭാഗങ്ങൾ രൂപപ്പെടുകയും ചെയ്തിട്ടുണ്ട്. കമ്പ്യൂട്ടർ എൻജിനീയറിങ്ങ്, സോഫ്റ്റ്വെയർ എൻജിനീയറിങ്ങ്, നാനോടെക്ക്നോളജി, മോളിക്കുലാർ എൻജിനീയറിങ്ങ്, മെക്കട്രോണിക്സ് മുതലായവ. ഇത്തരം വിഭാഗങ്ങൾ പഴയ വിഭാഗങ്ങളുമായി ചേർന്ന് പുതിയ വിഭാഗങ്ങൾ രൂപംകൊള്ളുകയും ചെയ്യുന്നുണ്ട്.

ഇത്തരത്തിലുള്ള എല്ലാ എൻജിനിയറിങ്ങ് കുറേ കാര്യങ്ങൾ പരസ്പരം പിണഞ്ഞ് കിടക്കാറുണ്ട്. ഭൗതികശാസ്ത്രം, രസതന്ത്രം, ഗണിതശാസ്ത്രം തുടങ്ങിയ ശാസ്ത്രങ്ങളുടെ പ്രായോഗീകരണം പോലുള്ള കാര്യങ്ങളിൽ.
പ്രശ്നങ്ങൾക്ക് പരിഹാരം കാണാനും നിലവിലുള്ള സൃഷ്ടികളെ പരിപോഷിപ്പിക്കാനുമായി എൻജിനീയർമാർ ഗണിതശാസ്ത്രവും ഭൗതികശാസ്ത്രവും ഉപയോഗപ്പെടുത്തുന്നു. പുതിയ സം‌രംഭങ്ങളുടെ രൂപകൽപ്പന വേളയിൽ അതുമായി ബന്ധപ്പെട്ട ശാസ്ത്രത്തിൽ അറിവുണ്ടാകേണ്ടതാണ്‌, അത് കൊണ്ട് തന്നെ തൊഴിൽജീവിതത്തിൽ ഉടനീളം പുതിയപുതിയ കാര്യങ്ങൾ പഠിച്ചുകൊണ്ടിരിക്കുക എന്നത് എൻജിനീയർക്ക് ആവശ്യമാണ്‌. ഒന്നിൽകൂടുതൽ പരിഹാരരീതിയുണ്ടെങ്കിൽ ആവശ്യകതകൾക്ക് ഏറ്റവും നന്നായി ചേരുന്നരീതി തെരഞ്ഞെടുക്കുകയും ചെയ്യുന്നു. നിർമ്മിക്കുവാൻ പോകുന്ന വ്യൂഹത്തിന്റെ രൂപഘടന വേളയിൽ അത് പാലിക്കേണ്ട നിബന്ധനകൾ ഏറ്റവും നന്നായി മനസ്സിലാക്കേണ്ടത് എൻജിനീയറുടെ ചുമതലയാണ്‌. മാത്രമല്ല മറ്റു ചില കാര്യങ്ങളിൽ കൂടി ശ്രദ്ധ പതിപ്പിക്കേണ്ടതുണ്ട്, ലഭ്യമായ സ്രോതസ്സുകൾ, അവയുടെ ഭൗതികവും സാങ്കേതികവുമായ പരിധികൾ, നിർമ്മാണചിലവ്, സുരക്ഷാമാനദണ്ഡങ്ങൾ, വിപണന സാധ്യതകൾ മുതലായവ. ഇത്തരം നിബന്ധനകളും ആവശ്യകതകളും മനസ്സിലാക്കിയതിന്‌ ശേഷം അനുയോജ്യമായ രൂപഘടനാ മാനദണ്ഡങ്ങൾ വികസിപ്പിച്ചെടുക്കുകയും ചെയ്യുന്നു.
രശ്നപരിഹാരത്തിന്‌ വേണ്ടി എൻജിനീയർ ശാസ്ത്രത്തിലും ഗണിതത്തിലുമുള്ള അറിവുകൾ, പരിചയസമ്പത്ത് എന്നിവ ഉപയോഗപ്പെടുത്തുന്നു. എൻജിനീയറിങ്ങ് എന്നത് പ്രയുക്ത ശാസ്ത്രത്തിന്റെയും ഗണിതത്തിന്റെയും ശാഖയായാണ്‌ കണക്കാക്കപ്പെടുന്നത്. അനുയോജ്യമായ ഗണിത മാതൃക സൃഷ്ടിക്കുന്നത് കാര്യങ്ങൾ വിശകലനം ചെയ്യാനും അതിന്റെ പ്രായോഗികത പരീക്ഷിക്കുവാനും സഹായിക്കുന്നു. സാധാരണയായി ഒന്നിൽ കൂടുതൽ പരിഹാരരീതി ലഭ്യമായിരിക്കും. ഇത്തരം സന്ദർഭങ്ങളിൽ ഒരോ രീതിയുടെയും മേന്മ മനസ്സിലാക്കി ഏത് രീതിയാണോ ഏറ്റവും നന്നായി ആവശ്യകതകളെ തൃപ്തിപ്പെടുത്തുന്നത് അതിനെ പിന്തുടരുന്നു.

പൂർണ്ണ തോതിലുള്ള ഉല്പാദനത്തിന്‌ മുൻപ് തങ്ങളുടെ രൂപകൽപ്പനകൾ എങ്ങനെ പ്രവർത്തിക്കും എന്ന് മനസ്സിലാക്കുവാൻ എൻജിനീയർമാർ ശ്രമിക്കാറുണ്ട്. അതിന്‌ വേണ്ടി ലഘുമാതൃക, ആദ്യരൂപം തുടങ്ങിയവ നിർമ്മിക്കുകയോ പലവിധം പരീക്ഷണങ്ങൾക്ക് വിധേയമാക്കുകയോ ചെയ്യുന്നു. ഇത്തരം പരീക്ഷണങ്ങൾ നിർമ്മിതിയുടെ ഫലം ഉറപ്പ് വരുത്തുന്നു. എൻജിനീയർമാർ തങ്ങൾ രൂപകൽപ്പനകൾ ഉദ്ദേശിച്ച ഫലം നൽകുന്നുണ്ടോ എന്നും അത് പൊതുജീവിതത്തെ മോശമായി ബാധിക്കാതെയിരിക്കാനും ഗൗരവപൂർണ്ണം കാണുകയും ചെയ്യുന്നു. അത്പോലെ നിർമ്മിതികളിലെ സുരക്ഷിതത്വം വളരെ പ്രാധാന്യത്തോടു കൂടി കാണുകയും അത് വഴി അപ്രതീക്ഷിത നാശനഷ്ടങ്ങളെ പ്രതിരോധിക്കുകയും ചെയ്യുന്നു. ഇങ്ങനെയാണെങ്കിലും എത്രത്തോളം സുരക്ഷിതത്വ ഘടകങ്ങൾ ചേർക്കുന്നുവോ അത്രത്തോളം തന്നെ ഉപയോഗക്ഷമത കുറവാനും ഇടയായേക്കാവുന്നതുമാണ്‌.
ആധുനിക ലോകത്തെ മറ്റുള്ള എല്ലാ മേഖലകളെയും പോലെ എൻജിനീയറിങ്ങിലും കമ്പ്യൂട്ടറുകളും സോഫ്റ്റ്വെയറുകളും സുപ്രധാന സ്ഥാനം വഹിക്കുന്നു. വാണിജ്യരംഗത്ത് ഉപയോഗിക്കപ്പെടുന്ന ആപ്ലിക്കേഷൻ സോഫ്റ്റ്വെയറുകൾ പോലെതന്നെ എൻജിനീയറിങ്ങ് മേഖലയ്ക്ക് വേണ്ടിയുള്ള പ്രത്യേകം സോഫ്റ്റ്വെയറുകളും നിലവിലുണ്ട്. ന്യൂമെറിക്കൽ രീതികൾകൊണ്ട് പരിഹരിക്കാൻ കഴിയുന്ന അടിസ്ഥാനപരമായ ഭൗതിക ക്രിയകളുടെ മാതൃകകൾ തയ്യാറാക്കുവാൻ സോഫ്റ്റ്വെയറുകൾ ഉപയോഗിക്കുവാൻ കഴിയും

ഈ മേഖലയിൽ വ്യാപകമായി ഉപയോഗിക്കപ്പെടുന്നവയാണ്‌ രൂപകൽപ്പന സഹായികൾ (computer-aided design, CAD). ഇവ നിർമ്മിതികളുടെ ത്രിമാന മാതൃകകളും ദ്വിമാന വരകളും രൂപരേഖകളും തയ്യാറാക്കുവാൻ സഹായിക്കുന്നു.
ഏതാനും വ്യക്തികൾ മുതൽ വലിയ സംഘങ്ങളുടെ കൂട്ടായ പ്രവർത്തനങ്ങൾ വരെ എൻജിനീയറിങ്ങിൽ വരുന്നുണ്ട്. മിക്കവാറും എൻജിനീയറിങ്ങ് സം‌രഭങ്ങളും കമ്പനികൾ, നിക്ഷേപകർ, ഗവണ്മെന്റ് എന്നിങ്ങനെയുള്ള ഏതെങ്കിലുമൊരു സാമ്പത്തിക പിന്തുണയുടെ നിയന്ത്രണത്തിലായിരിക്കും.

സമൂഹവുമായും മനുഷ്യന്റെ പെരുമാറ്റവുമായി നന്നായി ബന്ധപ്പെട്ടിരിക്കുന്നതാണ് എൻജിനീയറിങ്ങ്. ആധുനിക സമൂഹത്തിലെ എല്ലാ ഉല്പന്നങ്ങളിലും നിർമ്മിതികളിലും എൻജിനീയറിങ്ങ് സ്വാധീനമുണ്ടായിരിക്കും. വളരെ ശക്തമായ ഉപകരണമായി വർത്തിക്കുന്ന ഒന്നാണ് എൻജിനീയറിങ്ങ് രൂപകൽപ്പന, പരിസ്ഥിതി, സമൂഹം, സാമ്പത്തികം തുടങ്ങിയവയിലെല്ലാം മാറ്റങ്ങൾ സൃഷ്ടിക്കാൻ കഴിവുള്ളതാണത്, പല എൻജിനീയറിങ്ങ് പരിശീലനസ്ഥാപനങ്ങളിലും നിർവ്വചിച്ചുവെക്കപ്പെട്ട എൻജിനീയറിങ്ങ് ധർമ്മനിഷ്ഠയനുസരിച്ച്, അതിന്റെ ഉപയോഗം വളരെ ഉത്തരവാദിത്വ ബോധത്തോടെയായിരിക്കണം.

വൈദ്യ മേഖലയിൽ വ്യവസ്ഥാപിതമായ രീതിയിൽ കാണപ്പെടുന്ന വിധത്തിലുള്ള ധർമ്മനിഷ്ഠ എൻജിനീയറിങ്ങിൽ വികസിച്ചു വന്നിട്ടില്ല, അതിനാൽ തന്നെ പല എൻജിനീയറിങ്ങ് സം‌രംഭങ്ങളും വിമർശനങ്ങൾ കൊണ്ടു വരുന്നവയാണ്. ആണവായുധങ്ങളുടെ നിർമ്മാണം, സ്പോർട്ട്സ് യൂട്ടിലിറ്റി വാഹനങ്ങളുടെ രൂപകൽപ്പനയും ഉപയോഗവും, എണ്ണ ഖനനം എന്നിവ വ്യത്യസ്ത എൻജീനീയറിങ്ങ് ശാഖകളിൽ അതിനുള്ള ഉദാഹരണങ്ങളാണ്.

മാനവവികസനത്തിന്റെ പ്രധാന ഘടകമാണ് എൻജിനീയറിങ്ങ്. കുറഞ്ഞ എൻജിനീയറിങ്ങ് കഴിവുള്ളതായ സഹാറ-ഇതര ആഫ്രിക്കൻ രാജ്യങ്ങൾ യാതൊരു പ്രത്യേകിച്ച് മുന്നൊരുക്കവുമില്ലാതെ അടിസ്ഥാനസൗകര്യ വികസനത്തിൽ പിന്നിൽ നിൽക്കുന്നത് ഇതിന്റെ ഒരു മുഖമാണ്. ആധുനീക യുഗത്തിൽ വികസന പ്രവർത്തനങ്ങൾക്കും അടിസ്ഥാന സൗകര്യ വികസനങ്ങൾക്കും സാങ്കേതികമായ മുന്നേറ്റത്തിനും അത്യാവശ്യം വേണ്ട എൻജിനീയറിങ്ങ് കഴിവുകൾ ഒഴിച്ചുകൂടാനാവാത്തതാണ്.
ശാസ്ത്രത്തിന്റെയും എൻജിനീയങ്ങിന്റെയും അഭ്യസനങ്ങൾ പലതും ഒന്നുതന്നെയാണ്; എൻജിനീയറിങ്ങിൽ ശാസ്ത്രം പ്രയോഗവൽക്കരിക്കപ്പെടുകയാണ് ചെയ്യുന്നത്. രണ്ടിലും ഊന്നൽ നൽകപ്പെടുന്നത് വസ്തുക്കളേയും പ്രതിഭാസങ്ങളേയും സൂക്ഷ്മ നിരീക്ഷണവിധേയമാക്കുന്നതിലാണ്. നിരീക്ഷണങ്ങൾ വിശകലനം ചെയ്യുന്നതിനും പങ്കുവെക്കുന്നതിനും രണ്ടിലും ഗണിതശാസ്ത്രവും വർഗ്ഗീകരണ മാനദണ്ഡങ്ങളും ഉപയോഗിക്കുന്നു.

ശാസ്ത്രജ്ഞർ അവരുടെ നിരീക്ഷണങ്ങൾ വിശകലനം ചെയ്യാൻ ശ്രമിക്കുകയും അത്തരം വിശകലനങ്ങൾ ഉപയോഗിച്ച് അതിന്റെ പ്രയോഗിക തലത്തെക്കുറിച്ച് ശുപാർശകൾ നടത്തുകയും ചെയ്യുന്നു. ശാസ്ത്രജ്ഞർക്ക് ചില അവസരങ്ങൾ എൻജിനീയറിങ്ങ് പ്രവർത്തനങ്ങൾ ആവശ്യമായി വരും, പരീക്ഷണത്തിനുള്ള ഉപകരണങ്ങളുടെ നിർമ്മാണം, പരീക്ഷണ മാതൃകകൾ നിർമ്മിക്കുക തുടങ്ങിയ അവസരങ്ങളിൽ. നേരേതിരിച്ച് സാങ്കേതികവിദ്യയുടെ വികസനവുമായി ബന്ധപ്പെട്ട് എൻജിനീയർമാർ പുതിയ കണ്ടെത്തലുകൾ നടത്തുന്നു, ഇത്തരം സന്ദർഭങ്ങളിൽ അവർ ശാസ്ത്രജ്ഞരായി മാറുന്നു.