11 Sa Mga Taga Filipos

[1:1] Pablo at Timoteo, mga alipin ni Jesu Kristo, sa lahat ng mga banal na nakay Kristo Jesus na nasa Philippi, kasama ng mga tagapangasiwa, at mga lingkod:
[1:2] Kagandahang loob sa inyo at kapayapaan mula sa ating Diyos Ama, at sa Panginoong Jesu Kristo.
[1:3] Nagpapasalamat ako sa aking Diyos tuwing naaalala ko kayo,
[1:4] palaging nananalangin ng may kagalakan sa bawat pananalangin ko para sa inyong lahat,
[1:5] dahil sa inyong partisipasyon kaugnay sa Masayang Balita mula sa pinakaunang araw hanggang ngayon;
[1:6] talagang kumbinsido sa bagay na ito na ang nagpasimula ng mabuting gawain sa inyo ay tatapusin ito hanggang sa Araw ni Jesu Kristo:
[1:7] kung paanong nararapat sa akin na isipin ang bagay na ito patungkol sa inyong lahat, dahil kayo ay nasa loob ng aking puso, parehong sa pagkakapiit ko at sa depensa, at patotoo ng Masayang Balita. Kayong lahat ay mga kabahagi sa kagandahang loob na nasa akin.
[1:8] Dahil ang Diyos ang Siya kong testigo, kung paanong minamahal ko kayong lahat sa pamamagitan ng wagas na puso ni Jesu Kristo.
[1:9] At ito ang dalangin ko na ang pag-ibig niyo ay labis-labis pang managana ng may kaalaman, at buong katalinuhan;
[1:10] para makilala niyo ang mga bagay na mas mainam, para kayo ay maging dalisay at walang kapintasan hanggang sa Araw ni Kristo;
[1:11] puno ng mga bunga ng katuwiran nang dahil kay Jesu Kristo, na nagreresulta sa karangalan at kapurihan ng Diyos.
[1:12] Pero nais kong malaman niyo, mga kapatid, na ang mga bagay na nangyari sa akin ay lumalabas na nagresulta pa sa paglaganap ng Masayang Balita,
[1:13] anupat ang mga pagkakakulong ko dahil kay Kristo ay hayag sa buong palasyo, at sa lahat ng iba pang lugar;
[1:14] at marami sa mga kapatiran sa Panginoon, na nabuo ang kumpiyansa dahil sa pagkakakulong ko ay naging sobrang tapang na wala nang kinatatakutan sa pagbabahagi ng Salita!
[1:15] Totoong may ilan rin na nangangaral kay Kristo dahil sa inggit at pakikipagtao, pero may ilan rin ay dahil sa mabuting kalooban:
[1:16] Ang isa ay nag-aanunsyo kay Kristo para sumikat, hindi taos sa puso, na nag-aakalang makakadagdag iyon ng hirap sa pagkakakulong ko:
[1:17] pero ang ilan ay mula sa pag-ibig, nalalamang ako ay nakatalaga para sa depensa ng Masayang Balita.
[1:18] Ano ngayon, kundi sa bawat paraan ng pamumuhay, kung sa pagkukunwari man o sa katotohanan, si Kristo ay maideklara; at nagdiriwang ako sa bagay na ito, at patuloy pang magdiriwang.
[1:19] Alam ko kasi na ito ay magreresulta tungo sa aking kaligtasan sa tulong ng inyong panalangin, at sa biyayang dala ng Espiritu ni Jesu Kristo,
[1:20] ayon sa aking inaasam-asam at pag-asa na hindi ko kailanman ikahihiya, kundi ng may buong katapangan, tulad sa tuwi-tuwina, na ngayon rin ay maluwalhati si Kristo sa pamamagitan ng katawan ko, kahit sa Buhay man o sa kamatayan.
[1:21] Para sa akin kasi, ang mabuhay ay si Kristo, at ang mamatay ay kapakinabangan.
[1:22] Kung ako man ay namumuhay sa loob ng laman, nagbubunga itong pagpapagal ko: at hindi ko alam kung ano ang pipiliin ko.
[1:23] Dahil ako ay naiipit sa pagitan ng dalawa, mayroon akong hangarin na lumisan, at makasama si Kristo; na mas lalong mainam:
[1:24] pero ang manatili sa loob ng laman ay kinkailangan alang-alang sa inyo.
[1:25] At tiwala sa bagay na ito, alam ko na ako ay mananatili at magpapatuloy na kasama niyong lahat na magreresulta sa paglago at kagalakan ng inyong pananampalataya;
[1:26] para ang kasiyahan niyo ay managana kay Kristo Jesus para sa akin dahil sa muli kong pagpunta sa inyo.
[1:27] Mamuhay lamang kayo ng karapat-dapat sa Masayang Balita ni Kristo para kung sakaling dumating ako at makita kayo, o kung ako man ay wala ay marinig ko ang mga bagay patungkol sa inyo, na kayo ay tumatayo sa iisang espiritu, iisang kaluluwa, sama-samang nakikipaglaban sa pananampalataya ng Masayang Balita;
[1:28] at hindi natatakot sa sinuman sa kanila na kumokontra: na siyang nagpapakita sa kanilang tiyak na pagkawasak, pero para sa inyo ay nagpapakita ng kaligtasan, at ito ay mula sa Diyos.
[1:29] Dahil ipinagkaloob sa inyo alang-alang kay Kristo, hindi lamang ang manalig sa Kanya, kundi ang magpakasakit rin alang-alang sa Kanya;
[1:30] na may parehas na laban, tulad sa inyong nakita sa akin, at ngayon ay naririnig niyo sa akin.
[2:1] Kaya kung mayroon mang pagpapalakasan kay Kristo, kung mayroon mang mensahe ng pag-ibig, kung mayroon mang pakikipagniig sa Espiritu, kung mayroon mang magandang saloobin, at kahabagan,
[2:2] punuin niyo ang aking kagalakan, na magkaroon kayo ng parehong kaunawaan, ng parehong pag-ibig, na may nagkakaisang kaisipan, na may iisang pang-unawa,
[2:3] walang bagay na ginagawa sa paraan ng pagtatalo o walang kabuluhang pagyayabang, kundi sa kapakumbabaan ay magturingan ang isa't isa na mas mahalaga ang iba kaysa sa kanilang mga sarili.
[2:4] Pagtuunan ng pansin ng bawat isa sa inyo hindi lamang ang mga pansariling interes, kundi ang mga interes rin ng iba.
[2:5] Ito kasi ang dapat na nasa inyong isipan, na na kay Kristo Jesus rin:
[2:6] na habang nasa kaanyuan ng Diyos ay hindi Niya itinuring na pagnanakaw ang maging kapantay ng Diyos:
[2:7] Gayun pa man ay tinanggalan Niya ang sarili Niya ng lahat ng karangalan nang kunin Niya ang kaanyuan ng isang alipin, nang magpakita sa anyo ng mga tao:
[2:8] at nang matagpuan Siya sa panlabas na katangian tulad ng isang tao ay ibinaba Niya ang sarili Niya, at naging masunurin hanggang kamatayan, maging ang kamatayan sa krus.
[2:9] Kaya naman ang Diyos ay itinanghal Siya sa rurok ng kapangyarihan, at ibinigay sa Kanya ang pangalan na pinakadakila sa lahat ng pangalan:
[2:10] para sa harap ng pangalan ni Jesus, bawat tuhod ay lumuhod, yung mga nasa langit, at yung mga nasa ibabaw ng daigdig, at yung mga nasa ilalim ng daigdig;
[2:11] at bawat dila ay magpahayag na Panginoon si Jesu Kristo para sa kaluwalhatian ng Diyos Ama.
[2:12] Kaya naman, mga minamahal ko, kung paanong kayo ay laging masunurin, hindi lamang kapag nasa harapan ko, kundi lalung-lalo na ngayong wala ako, kumilos kayo para sa inyong sariling kaligtasan ng may takot at panginginig!
[2:13] Ang Diyos kasi ang Siyang kumikilos rin sa kalooban niyo, para hangarin at para gawin ang naaayon sa kabutihan.
[2:14] Gawin niyo ang lahat ng bagay na walang pagrereklamo at pagtatalo:
[2:15] para kayo ay maging walang bahid dungis, at puro, mga anak ng Diyos na walang kapintasan sa gitna ng liko at bulok na henerasyon, kung saan kayo ay nagniningning tulad ng mga ilawan sa mundo;
[2:16] pinanghahawakan ang Salita ng Buhay para ako ay may ipagmalaki sa Araw ni Kristo, na hindi ako tumakbo ng walang kabuluhan ni nagpagod sa wala.
[2:17] Subalit kung ako rin ay ibinubuhos alang-alang sa pag-aalay at paglilingkod para sa pananampalataya niyo, masaya ako at nagdiriwang kasama niyong lahat.
[2:18] At sa ganito ring dahilan ay nagdiriwang kayo, at nagdiriwang kayong kasama ko.
[2:19] Pero umaasa ako sa Panginoong Jesus na ipadala agad si Timoteo sa inyo para ako rin ay mapalakas ang loob kapag nalaman ko ang mga bagay patungkol sa inyo.
[2:20] Wala kasi akong tao na may katulad na kaluluwa na totoong magmamalasakit sa mga bagay na patungkol sa inyo.
[2:21] Ang lahat kasi ay iniisip lamang ang kanilang mga sarili, hindi ang mga bagay na patungkol kay Kristo Jesus.
[2:22] Alam niyo naman ang patotoo niya, na parang isang anak sa tatay, kasama ko siyang naglingkod para sa Masayang Balita.
[2:23] Kaya naman sa panahong ito ay umaasa akong ipadala siya sa oras na mabigyan ko na ng atensyon ang mga bagay na patungkol sa akin.
[2:24] Pero tiwala ako sa Panginoon na ako rin ay darating agad diyan.
[2:25] Pero sa tingin ko ay kailangan na ipadala sa inyo si Epafrodito na kapatid at kamanggagawa, at kapwa ko sundalo, at inyong mensahero, at isang lingkod para sa pangangailangan ko.
[2:26] Dahil nasasabik na siya sa inyong lahat at nalulungkot dahil narinig niyo na nagkasakit siya.
[2:27] At talagang nagkasakit siya na halos ikamatay niya, pero ang Diyos ay nahabag sa kanya; at hindi lamang sa kanya, pati na rin sa akin, kundi ay nagkaroon na ako ng patong-patong na hirap!
[2:28] Kaya ipinadala ko siya agad, para, sa pagkikita niyong muli ay matuwa kayo, at ang kalungkutan ko ay mawala.
[2:29] Kaya tanggapin niyo siya sa Panginoon nang may buong kagalakan, at ituring niyo na napakahalaga ang ganitong uri ng tao:
[2:30] dahil alang-alang sa gawain ni Kristo ay napalapit siya hanggang sa kamatayan, hindi isinaalang-alang ang kaluluwa para matugunan niya ang pagkukulang sa paglilingkod niyo para sa akin.
[3:1] Sa wakas, mga kapatid ko, magdiwang kayo sa Panginoon. Hindi naman problema sa akin na isulat sa inyo uli ang mga bagay na ito, para naman ito sa kaligtasan niyo.
[3:2] Mag-ingat kayo sa mga aso, mag-ingat kayo sa mga masasamang manggagawa, mag-ingat kayo sa namumutol ng laman.
[3:3] Tayo kasi ang Pagtutuli na sumasamba sa Diyos sa espiritu, at nagdiriwang kay Kristo Jesus, at hindi sa laman nagtitiwala.
[3:4] Kahit naman ako ay may ipagmamalaki sa laman. Kung sinuman ay nag-iisip na magtiwala sa laman, lalo na ako:
[3:5] Tinuli ng ika-8 araw, mula sa lahi ni Israel, sa tribo ni Benjamin, isang Hebreo na galing sa mga Hebreo, patungkol sa Batas, isang Pariseo;
[3:6] patungkol sa sigasig, mang-uusig ng Konggregasyon; patungkol sa katuwiran na nasa Batas, walang kapintasan.
[3:7] Pero anumang bagay ang may pakinabang sa akin, itinuturing ko ang mga bagay na itong kalugihan alang-alang kay Kristo.
[3:8] Higit pa rito, itinuturing ko rin ang lahat ng bagay na kalugihan alang-alang sa kadakilaan ng pagkakakilala kay Kristo Jesus na Panginoon ko, na dahil sa Kanya ay tiniis ko ang mawalan ng lahat ng bagay, na itinuturing ko nang mga basura para lang makamtan ko si Kristo,
[3:9] at matagpuan na nasa Kanya, hindi taglay ang sarili kong katuwiran na mula sa Batas, kundi iyong sa pamamagitan ng pananalig na galing kay Kristo, ang katuwiran na galing sa Diyos dala ng pananampalataya:
[3:10] para makilala Siya, at ang kapangyarihan ng Kanyang pagbangon mula sa mga patay, at ang pakikisalo sa mga paghihirap Niya, para matulad sa kamatayan Niya;
[3:11] Kung sakali man ako ay umabot sa pagbangon ng mga patay.
[3:12] Hindi dahil sa naabot ko na, o natapos ko na: pero ako ay tumatakbo sa pag-asa na makuha ko rin ang bagay na siyang dahilan rin kung bakit ako kinuha ni Kristo Jesus.
[3:13] Mga kapatid, ako sa sarili ko, hindi ko itinuturing na nakuha ko na: pero isang bagay ang totoo, kinakalimutan ko ang nakaraan na, at sinisikap kong abutin ang mga bagay na nasa harapan.
[3:14] Tumatakbo ako papunta sa hangganan para sa gantimpala ng mataas na pagkatawag ng Diyos kay Kristo Jesus.
[3:15] Kaya naman, lahat kayong mga sakdal ay ganito ang dapat na isipin, at kung sinuman sa inyo ay may ibang kaisipan, ito rin ay ipahahayag sa inyo ng Diyos.
[3:16] Kaya kung anuman ang natutunan natin, lumakad tayo sa iisang pamantayan, sa iisang kaisipan.
[3:17] Mga kapatid, samahan niyo ako sa pagsunod, at kung paanong kami ay ginawa niyong halimbawa, tularan niyo sila na lumalakad sa ganitong paraan.
[3:18] Marami kasi ang lumalakad (yung madalas kong sabihin sa inyo, at kahit ngayon ay luhaan kong sinasabi) na mga kalaban ng krus ni Kristo:
[3:19] na ang hangganan ay pagkawasak, na ang Diyos ay ang tiyan, at ang karangalan ay nasa kanilang kahihiyan, na nakatuon ang isip sa mga bagay na makalupa.
[3:20] Nasa loob ng langit kasi matatagpuan ang ating bansa, kung saan rin natin hinihintay ang Tagapagligtas, ang Panginoong Jesu Kristo
[3:21] na Siyang babago sa ating abang katawan, para ito ay maging katulad sa Kanyang marangal na katawan, ayon sa kapangyarihan kung saan ay nagawa Niya ring isailalim ang lahat ng bagay sa Kanyang sarili.
[4:1] Kaya naman, mga kapatid kong minamahal at hinahanap-hanap, ang aking kagalakan at korona, sa ganitong paraan kayo manatiling nakatayo sa Panginoon, mga minamahal.
[4:2] Nakikiusap ako kay Udias, at nakikiusap ako kay Sintike na magkaroon ng iisang kaisipan para sa Panginoon.
[4:3] At hinihiling ko rin sa iyo, tunay na kamanggagawa, na tulungan mo ang mga kababaihang ito na nakasama kong magpagal para sa Masayang Balita, kasama rin si Clemente, at iba pang kamanggagawa ko na ang mga pangalan ay nasa Aklat ng Buhay.
[4:4] Magdiwang kayo lagi sa Panginoon: muli kong sasabihin, magdiwang kayo.
[4:5] Hayaan niyong malaman ng lahat ng tao ang kabaitan niyo. Nalalapit na ang Panginoon.
[4:6] Huwag kayong mag-alala sa anumang bagay, sa halip ay sa lahat ng pagkakataon, sa pananalangin at sa pagsusumamo nang may pasasalamat, ay ipaalam niyo sa harap ng Diyos ang mga kahilingan niyo.
[4:7] At ang kapayapaan ng Diyos na higit pa sa lahat ng kaunawaan ang magbabantay sa mga puso niyo, at sa mga iniisip niyo sa piling ni Kristo Jesus.
[4:8] Sa wakas mga kapatid, anumang bagay ang totoo, anumang bagay ang marangal, anumang bagay ang matuwid, anumang bagay ang malinis, anumang bagay ang kaibig-ibig, anumang bagay ang maganda sa pandinig, kung may anumang kabutihan, at kung may anumang papuri, ang mga bagay na ito ang inyong bigyan ng atensyon.
[4:9] Gawin niyo ang mga bagay na parehas niyong natutunan, at tinanggap, at narinig, at nakita sa akin: at ang Diyos ng kapayapaan ay sasamahan kayo.
[4:10] Pero sobra akong natuwa sa Panginoon, dahil ngayon sa wakas ay umusbong muli ang atensyon niyo para sa akin; kung saan ay nakatuon naman ang atensyon niyo, pero wala kayong pagkakataon.
[4:11] Ako ay nagsasalita hindi dahil sa kahirapan: dahil ako ay natuto na sa harap ng anumang bagay na ako ay maging kuntento.
[4:12] Pareho kong alam kung paano maging aba, at kung paano mag-umapaw: sa lahat ng situwasyon, at sa lahat ng bagay ako ay naturuan, parehong naturuan kung paano mabusog, at magutom, parehong naturuan kung paano managana, at maghirap.
[4:13] Matatag ako sa lahat ng bagay sa pamamagitan ni Kristo na nagpapalakas sa akin.
[4:14] Gayunpaman, maganda ang ginawa niyo na tumulong sa pagsubok ko.
[4:15] Ngayon, kayong mga taga Philippi, alam niyo rin na sa simula pa lang ng Masayang Balita, nang umalis ako mula sa Macedonia, walang konggregasyon ang tumulong sa akin patungkol sa pagbibigay, at pagtanggap, kundi kayo lamang.
[4:16] Dahil kahit sa Thessalonica ay nagpadala kayo ng minsan at ng ikalawang beses para sa mga pangangailangan ko.
[4:17] Hindi dahil naghahanap ako ng matatanggap, kundi ang hinahanap ko ay ang bunga na dumaragdag sa puntos niyo.
[4:18] Pero mayroon na ako ng lahat ng bagay, at sobra-sobra pa: kumpleto na ako nang tanggapin ko mula kay Epaphrodito ang mga bagay na mula sa inyo, na isang mabangong alay, katanggap-tanggap, nakatutuwa para sa Diyos.
[4:19] At ang Diyos ko ang pupuno sa lahat ng pangangailangan niyo ayon sa maluwalhating kayamanan Niya kay Kristo Jesus.
[4:20] Ngayon, sa Diyos at Ama natin ang kaluwalhatian magpakailanman. Amen.
[4:21] Pakibati niyo ang bawat santo sa harap ni Kristo Jesus. Ang mga kapatiran na kasama ko ay binabati kayo.
[4:22] Binabati kayo ng lahat ng mga santo, lalu na ang mga taga sambahayan ng Emperador.
[4:23] Ang kagandahang-loob ng ating Panginoong Jesu-Kristo ay sumainyong lahat. Amen. Isinulat ito sa tulong ni Epaphrodito sa mga taga Philippi mula sa Rome.