Aulas saudables no CIFP Ferrolterra
A situación de pandemia motivada pola COVID-19 está a xerar a necesidade de ventilar os espazos cunha frecuencia maior do que se facía ata o de agora. Isto débese a que investigadores determinaron que existe unha relación entre os niveis de CO2 e o virus, xa que, se o CO2 está concentrado, o virus estará tamén concentrado exactamente igual, incrementándose a probabilidade de contaxio. A concentración de CO2 en espazos interiores cerrados aumenta rapidamente na presenza de persoas, que exhalan CO2 ao respirar. A renovación do aire co aire exterior reduce as concentracións de CO2 no interior. Para optimizar esta necesidade de ventilación están a xurdir distintos aparellos de detección de CO2, moitos deles de baixo custo ou low cost. A problemática dalgúns destes últimos é que non fan unha medición real do CO2, senón unha estimación ou prorrateo en función da medición doutros parámetros. A idea do proxecto “Aulas saudables no CIFP Ferrolterra” xurde da necesidade de ventilación motivada pola pandemia da COVID-19 no noso centro, e da de dispoñer dun sistema de baixo custo que permita contar cunha unidade de detección por aula: ao tratarse dun centro tan grande, unhas 50. A posibilidade de que sexa construíble, programable e reparable no propio centro permitiríanos chegar a telas en menos tempo e cun baixo prezo por unidade. Ademais, no modelo proposto empregarase un sensor de CO2 que nos proporcionará información directa da súa concentración, e non de xeito estimativo a partir de outros parámetros. Neste caso usarase un sensor de infravermellos MH-Z19 (B ou C) para detectar a concentración de CO2. A información deste sensor será consultada mediante unha placa de Arduino, sendo este Arduino o que mandará a información a tres saídas: • Pantalla display de 7 segmentos: indicará as partes por millón (en diante ppm) de CO2. Os 7 segmentos permitirán unha visualización a longa distancia, a diferenza de outros tipos, dende distintos puntos da aula. • Leds: verde, ≤500 ppm; amarelo, >500 ppm; vermello, >800 ppm. • Bocina ou buzzer: que emitirá un sinal sonoro cando se acade o nivel vermello.
Unha vez superada a pandemia a súa utilidade manterase, xa que estes detectores tamén avisarán da nocividade das altas concentracións de CO2 que se xeran en aulas con moito alumnado, mellorando o ambiente na aula. A renovación do aire favorece a atención e o rendemento escolar, xa que a exposición a concentracións de CO2 demasiado elevadas produce aletargamento e dificulta a atención. O RD 1027/2007, RITE, definido en situación de non-pandemia, indica unha ventilación de 12,5 litros por persoa e segundo para aulas de ensino e 20 litros por persoa e segundo para garderías. Así mesmo, deséxase que este proxecto sirva para a implantación destes detectores nas aulas de outros centros, concibíndoa como o resultado final dun proxecto multidisciplinar. Este detector low cost será facilmente asumible economicamente e autoconstruíble por calquera departamento de tecnoloxía de Galicia que conte cunha impresora 3D para a construción da carcasa. No caso de que o departamento non conte coa impresora 3D poderase adaptar o proxecto cunha caixa plástica ou con características similares. Coa participación do alumnado tentarase espertar neles a súa curiosidade maker e inicialos neste mundo con grande proxección de futuro. • En primeiro lugar un modelo básico de detector de CO2 low cost cun display de 7 segmentos no que se mostre a cantidade numérica de CO2 que hai na aula, e tres leds (vermello, amarelo e verde) a modo de semáforo, que indiquen a peligrosidade da concentración en función duns rangos establecidos. Unha emisión sonora avisará de cando a situación obrigue a abrir as fiestras para ventilar. Este sensor medirá valores dende 400 ppm (aire limpo) ata un máximo de 2000-5000 ppm, facendo unha lectura continua (por minuto) que fai que se detecten os incrementos de CO2 que se produzan. No display veranse as ppm de CO2.