example-ori-corpus-james-asg.txt

 Mpa ɗa Yakubu kagbashi ka̱ Ka̱shile n ke Yesu Vuzagbayin Kishi.
Mi ta̱ a kuɗanaka uma a̱ Ka̱shile a na e nekei a̱ɗu ɗa i ida̱shi uvishuwi a̱ ubuta̱ kakau.
Mi ta̱ a̱ kusuku ikya̱shi i va̱ a kubana wa̱ ɗa̱.
 A̱ja̱'a̱ a̱ va̱, ya'in ma̱za̱nga̱ ra̱ka̱ vu ɗa̱ ayin a na baci kukondo kakau ku ta̱wa̱i wa̱ ɗa̱.  I yeve ta̱ i ili i nan lo yi ta̱ o kukondo uneki wa̱ a̱ɗu u ɗa̱. Kukondo ku nan lo ka ku ɗa ka kuzuwa ɗa̱ i lulukpa̱.  Lulukpa̱i ali kukondo ku ɗa̱ ku laza. Ayin a na baci ku lazai, ka̱ta̱ yo okpo uma a na i derere. Ayin a nan lo, ili i na baci i nambai yi ta̱ a̱ kuciya̱ i ɗa.  Vuza yoku a̱ ka̱tsuma̱ ka̱ ɗa̱ u namba baci ugboji, u folono ubuta̱ u Ka̱shile, a̱yi Ka̱shile u ci ya'an ta̱ kune'e ku ni a kubana u yaba dem ba̱ri. U ci neke ta̱ u vuza na u folonoi ni dem, u tsu dansaka vuza kafu u neke yi ba.  Amma i folono baci ili, u ga'an ta̱ i neke a̱ɗu ka̱ta̱ i yongo a̱ munla̱i ba, ko i kuciya̱ ta̱ ili i nan lo ba. Amma i ya'an baci munla̱i, yi ta̱ o kokpo an aɓau a na wunla̱i u tsu tuka̱ a zuwa mini a kubana kelime n ka̱ca̱pa̱.  Vuma vu na ka̱ɗu ka̱ ni ki nannai, ka̱ta̱ u keɗe a̱pa̱'a̱ wi ta̱ a̱ kuciya̱ ili i na u folonoi ba.  A̱yi vuma vu nan lo u tsu fuɗa u sheshe mayin ili i na wi a kuciga wa ya'an n ka̱ɗu ka̱ ni ba.
 Aza o Kutoni a na i n iyali o yotso ta̱ a ya'an ma̱za̱nga̱ adama a na Ka̱shile ko bonoko le ta̱ uma ɗa u ɗengusa̱i le.  Aza o Kutoni a na i n uciyi u ga'an ta̱ a ya'an ma̱za̱nga̱ adama a na Ka̱shile ko yotsongu le ta̱ uteku u na o kugoyo ka̱ci ke le. Vuma vu uciyi wi ta̱ an mita̱ ma na mo tsu gbonguro a kakamba ka̱ta̱ a kubana megeshe ma̱ kula̱.  Kanna ka̱ tsu uta̱ ta̱ n usuɗukpi ka̱u, ka̱ta̱ u ɗekpetengu mita̱ ma, ka̱ta̱ a̱pa̱lu a̱ yikpa̱, ka̱ta̱ uga'in u ni u kotso. Ta kpamu vuza vu uciyi u kukuwa̱ nannai a̱ ka̱tsuma̱ ka ayin a na wi a kataci ku ulinga u ni.
 Ka̱shile ke ci neke ta̱ ma̱za̱nga̱ a̱ ubuta̱ u uma a na a̱ lulukpa̱i ɗa kpamu e remei a̱ɗu a ayin o kukondo. A ayin a na baci kukondo ka ku kotsoi, Ka̱shile ki ta̱ e kuneke okolokolo a wuma u babu uteku a̱ ubuta̱ u vuza na u la'i utsura u kukondo wa. Ka̱shile ka ya'an ta̱ uzuwakpani nannai a̱ ubuta̱ wa aza a na a cigai ni.
 Vuza wi baci a kuciga kuya'an unushi, ka̱ta̱ u dana Ka̱shile ka'a ki a kuya'anka yi ugboji u ya'an unushi ba. Ka̱shile ka ci ciga kuya'an kavama ba. Ta kpamu nannai Ka̱shile ka tsu zuwa vuza u ya'an ili i kavama ba.  A̱shawuya a̱ tsu a ɗa ubuta̱ yoku a̱ ci ya̱nsa̱ tsu ci ya'an ili i kavama.  A̱shawuya a ya'an baci ka̱tsuma̱ ka̱ta̱ a matsa unushi. Ka̱ta̱ unushi u gbonguro ka̱u, ali ka̱ta̱ u matsa ukpa̱ wa̱ nu.
 Ncigi n va̱ ka̱u, ka̱ta̱ i ka̱sa̱kpa̱ a̱ ya̱nsa̱ ɗa̱ n a'uwa ba.  Ili i na i ga'in dem n i na yi derere, kune'e ku ɗa ku na ku uta̱i gaɗi a̱ ubuta̱ u Ka̱shile. Ili i nam pa dem Ka̱shile ka na ka ya'in kutashi ku na ki gaɗi a̱yi ɗa u nekei tsu i ɗa. A̱yi wi an kululu ba, kululu ku tsu saba'a ta̱ kanna ka saba'a baci, a̱yi wi a kusaba'a ba.  U ciga tsu ta̱ tso okpo ncigi n ni, i ɗaɗa i zuwai ɗa u suki akaka a mayun a̱ ni wa̱ tsu. Ɗa akaka a a matsai tsu tso okpo an ngaji n ni.
 Ncigi n va̱ ka̱u, u yotso ta̱ yo okpo aza a kupana gogo'o, amma yo okpo aza a kudansa sawu, ka̱ta̱ kpamu yo okpo aza a kuya'an wupa gogo'o ba.  I ya'an baci wupa, ya kufuɗa ya ya'an ili i singai i na Ka̱shile ki a kuciga i ya'an ba.  Mayun ɗa i ka̱sa̱kpa̱ kuya'an tsugbani n kavama. Ana ya kuya'an nannai, i kucikpa i goyo ka̱ci ka̱ ɗa̱, ka̱ta̱ yi isa kadanshi ka na a̱ ca̱'i a̱ a̱ɗu a̱ ɗa̱. Kadanshi ka nam pa ka ki ta̱ n utsura u kisa ɗa̱.
 U ga'an ta̱ yo okpo aza a na a kuya'an ili i na kadanshi ka̱ Ka̱shile ka danai i ya'an. Ka̱ta̱ yo okpo aza a kupana n atsuvu koci ba. Yi baci nannai, yi ta̱ a̱ kuya̱nsa̱ ka̱ci ka̱ ɗa̱.  Vuma u pana baci kadanshi ka na Ka̱shile ka danai, amma u ya'an ili i na ka danai a ya'an ba, vuma vu nan lo wi ta̱ an vuma vu na vi ci inda ka̱ci ka̱ ni a mindatsu,  amma u laza baci ka̱ta̱ u cinukpa n uteku u na ka̱ci ka̱ ni ki gogo lo.  Amma vuma wi inda baci wila̱ u Ka̱shile u na wi derere, ɗa u ya'in ili i na u danai, vuma vu nan lo wi ta̱ a̱ kuciya̱ una̱singai, wi ta̱ kpamu o kuyongo ba̱ri tsu na wila̱ u Ka̱shile u ci neke. Amma vuma vu na u ci inda Wila̱, ka̱ta̱ u cinukpa u ci yongo ba̱ri ba.
 Vuza na baci we enei adanshi wi ta̱ o kutono Ka̱shile, amma vuma vu nan lo u fuɗa u goso kelentsu ka̱ ni ba, wi ta̱ a̱ kuya̱nsa̱ ka̱ci ka̱ ni kutoni ku ni kpamu ko okpo ta̱ gbani.  Uye u mayun n u derere u na o kutono Ka̱shile Esheku a̱ tsu u ɗaɗa tsu la̱na̱ mkpa'an n agapa. Ka̱ta̱ kpamu tso okpo n a̱shinda̱ n ili ya aduniyan ba.
 Uma a̱ va̱, Vuzagbayin Yesu Kishi vuma vu gbayin ɗa. Ka̱ta̱ i cikpa vuza yoku u la'a vuza yoku ba, adama a na i neke ta̱ a̱ɗu a̱ ɗa̱ u Kishi.  Agisana, vuza u ta̱wa̱ baci a̱ ubuta̱ u koɓolo u ɗa̱, nu ntogu n singai nu nkawani mi ikebe ma azanariya u u'uki. Ɗa vuma vi yoku vi yali u uwai a̱ ubuta̱ u koɓolo, u ukai akashi nu ntogu n na mo o'oi ɗe.  Ɗa i bonokoi a̱shi a̱ ɗa̱ ubuta̱ u vuza na u ukai a̱kumbula̱, ɗa i danai ni, <<Ili yi ida̱shi i ɗa na.>> Ɗa i danai vuza yali, <<Shamgba na ɗe,>> ko <<Da̱sa̱ngu a iɗika uɓon wa̱ a̱civa̱ e ene a̱ va̱.>>  I ya'an baci nannai, yi ta̱ e kupece uma, yi ta̱ kpamu a kuya'an uteku u na eyevafada a na i n kusheshe ku kavama a ci ya'an.
 Uma a̱ va̱, kasai atsuvu a̱ ɗa̱ mayin, Ka̱shile ka zagba ta̱ aza a yali a aduniyan o okpo aza a̱ uciyi a̱ ubuta̱ u kuneke wa̱ a̱ɗu. A zagba le ta̱ adama a na o okpo aza a na a̱ kuciya̱ tsugono tsu na a ya'in uzuwakpani u kuneke aza a na a cigai ni.  N nannai dem, ɗa yi a kushika aza a unambi. Amma aza a̱ uciyi ele ɗa aza a na a tsu takacika ɗa̱, ka̱ta̱ o rono ɗa̱ a kubana a̱ ubuta̱ wa afada ba?  Ele ɗa kpamu a tsu dansa ili i kavama adama a kula ku singai ku Yesu, kula ku na i ci yongo n ku ɗa feu ba?
 Yi ta̱ a kuya'an ili i na i ga'in, i ya'an baci ili i na wila̱ u tsugono u na wi punu a Katagarda ka Ciɗa u danai, <<Ciga vuza nu vu na vi ida̱shi ɗevu n avu uteku u na vi cigai ka̱ci ka̱ nu.>>  I ci ya'anka baci uma uteku u na i ce ene le pulai, i ya'an ta̱ unushi, adama a na wila̱ u dana a ya'an nannai ba.  Vuza u tono baci Wila̱ u Ka̱shile dem, ɗa u nusai u te, u ya'an ta̱ unushi u na u koɗoi u ɗa ra̱ka̱.  Ka̱shile ka na ka danai, <<Ka̱ta̱ vi ya'an tsugbani ba.>> A̱yi ɗa feu u danai, <<Ka̱ta̱ vu una vuza ba.>> Ko an vi ya'in tsugbani ba, amma vu una baci vuza, vo okpo ta̱ kokoɗi ka̱ Wila̱ ra̱ka̱.
 Adama a nannai, a̱ ka̱tsuma̱ kadanshi ka̱ nu n ili i na vi a kuya'an, ya'an adanshi i ta̱ a kuya'anka wu afada gogo va lo n wila̱ u na wi a kuzuwa wu vi yongo ba̱ri.  Vu tsu pana baci asuvayali a uma o yoku ba, a kupana asuvayali a̱ nu ba. Amma vu tsu pana baci asuvayali, ayin a nan lo a ɗa, asuvayali a̱ Ka̱shile a kulya'a ta̱ utsura wa afada a̱ ni a na wi ishi a kuya'anka wu.
 Uma a̱ va̱, te ɗai ariba a na vu dana baci vi ta̱ n uneki u ka̱ɗu, amma vi n ulinga u na vi ya'in ka̱ta̱ vi yotsongu a̱ ubuta̱ wi ili i na i ya'in ba? Uneki u ka̱ɗu wi baci nannai wa kisa vuza ba.  Ve ene baci vuza na wi a kuciga motogu ko ilikulya'a,  ɗa vu danai, <<Kya̱sa̱ wu,>> ɗa kpamu vu danai, <<Ka̱shile ka zuwaka wu una̱singai, vu da̱sa̱ngu m ma̱ta̱na̱ ka̱ta̱ vi lya'a mayin,>> amma vi neke vuza nan lo ilikulya'a ba, ko motogu ba. Te ɗai uga'in u kadanshi u nan lo wi?  Ta baci vi nannai, vi nekei ka̱ɗu koci, amma vi ya'an ulinga ba, uneki u ka̱ɗu u nan lo wi ta̱ ukpa̱.
 Vuza yoku we ece mu baci, <<Vi ta̱ n uneki u ka̱ɗu?>> Mi ta̱ a̱ kushuku yi, <<Mpa mi ta̱ n ulinga u na n ya'in.>> Ka̱ta̱ n dana yi feu, <<Nini ɗai vo kuyotsongu mu uneki u ka̱ɗu u nu, amma vi ya'an ili i singai ba? N kuyotsongu wu ta̱ uneki u ka̱ɗu u va̱ n ili i singai i na n ya'in.>>
 Vu ushuku ta̱ an Ka̱shile ke te ka'a. U ga'an ta̱. Wunla̱i u gbani-gbani feu wu ushuku ta̱ nannai. U tsu zuwa le ta̱ kpamu kuje'eke ikyamba n wovon.
 Avu kalau ka vuma, vi ciga ta̱ vuza yoku u yotsongu wu uneki u ka̱ɗu babu ulinga u singai, vi yeve ta̱ ili i gbani i ɗa?  Panai ili i nam pa, akaya a̱ tsu Ibrahim u sa'a ta̱ Ka̱shile ka̱ɗu ana u zuwai maku mo kolobo ma̱ ni Ishaku a katalikalyuka adama a na u ya'an alyuka n a̱yi.  Gogo na, ye ene ta̱ uteku u na uneki u ka̱ɗu wi Ibrahim wi koɓolo n ili i na u ya'in. U yotsongu ta̱ uneki u ka̱ɗu u ni mayun ɗa, a̱ ubuta̱ wi ili i na u ya'in.  Ili i na Katagarda ka Ciɗa ka̱ ciya̱i i ɗa na, ana ka danai, <<Ibrahim u ya'an ta̱ uneki u ka̱ɗu u Ka̱shile, ɗa wo okpoi vuza ciɗa a̱ ubuta̱ u Ka̱shile.>> Ta Ibrahim wo okpoi ka̱ja̱'a̱ ka̱ Ka̱shile nannai.  Gogo na ye ene ta̱ tso okpo ta̱ uma a ciɗa a̱ ubuta̱ u Ka̱shile n ubuta̱ wi ili i na ci a kuya'an, amma uneki u ka̱ɗu u ɗa koci ba.
 Agisana, Rahapu kashakanlai ka'a. Amma u sa'a ta̱ Ka̱shile ka̱ɗu ana u foɓoi aza a kasaka ki iɗika, ana wu uta̱ka̱i le ɗa o tonoi uye u yoku a kubana a kpa'a.  Ikyamba yi baci babu ayinviki, ikyamba i nan lo yi ta̱ ukpa̱, ta kpamu nannai uneki u ka̱ɗu u na wi babu ulinga wi ta̱ ukpa̱.
 Uma a̱ va̱, uma n a̱bunda̱i ɗa o kokpo nlum ba. I yeve ta̱ Ka̱shile ki ta̱ a kuya'anka tsu afada ka̱u a na a la'i uma a na a buwai, adama a na a̱tsu nlum n ɗa.
 Tsu tsu nusa ta̱ ka̱u, amma aza a na a tsu fuɗa e reme elentsu e le i ta̱ kpamu a kufuɗa a̱ ka̱na̱ ka̱ci ke le a̱ ubuta̱ dem.  Tsu tsu zuwa baci iryangama a̱ una̱ wo odoku adama a na a panaka tsu, ka̱ta̱ a ya'an ili i na ci a kuciga a ya'an.  Ta kpamu ki nannai a̱ ubuta̱ u antsu. I ta̱ n ugbonguri, wunla̱i u ci ɗika le ta̱. Ko n nannai vuza vu kpantsu u tsu uka ta̱ n katamatsu, ka̱ta̱ u pinda̱ra̱ kpantsu ku ni a kubana a̱ ubuta̱ u na wi a kuciga ku ɗa ku bana.  Ta kpamu nannai kelentsu ili i kenu i ɗa a ikyamba i vuza, ki ta̱ a kufuɗa ka ya'an ili kakau i gbagba'in. Kakamba ka gbayin ki ta̱ a kufuɗa kukula̱ adama a̱ ka̱ga̱ra̱wa̱shi ke te kenu.  Kelentsu feu ki ta̱ an melentsu ma akina, ka ki ta̱ tukpa n ili i wuya. Ki ta̱ a̱ kula̱nga̱sa̱ wuma u nu ra̱ka̱, adama a na akina a nan lo a̱ uta̱ ta̱ a kpa'a ka akina, a ɗa i o kusongu ili dem.
 Uma a tsu zuwa ta̱ icu'u yi nnama kakau a panaka le, ali nu nnu, n oko, n adan.  Amma vuza u kufuɗa wa zuwa kelentsu ka̱ ni ka panaka yi ba. Kelentsu ili i kavama i ɗa i na i canai kufoɓongu ba. Ka ki ta̱ n tsukono ka̱u.
 N elentsu a̱ tsu a ɗa tsa kucikpa Vuzagbayin n Esheku a̱ tsu. N kelentsu ke te ka nan lo kpamu ka ɗa ci ya'anka uma una̱ u wuya, a na Ka̱shile ka ya'in uteku ci ni kpamu.  Kucikpa n una̱ u wuya i ta̱ kuta̱ a̱ ubuta̱ u te. Uma a̱ va̱, u yotso ili ya i ya'an nannai ba.  Ka̱shi ka̱ mini ka̱ tsu uwa̱ mini ma singai koɓolo m mo okono ba.  Vi ta̱ a kuta'a umaci u ma̱biri a maɗanga ma̱ ma̱ɗimbi? Ko umaci u ma̱ɗimbi a maɗanga me mepeshe? A̱'a̱! Ve kukenuku mini ma singai m mini mo okono a̱ ubuta̱ u te ba.
 A̱ ka̱tsuma̱ ka̱ ɗa̱ vuza wi ta̱ punu vuza na wi n ugboji n kuyeve ki ili i Ka̱shile? Uma a na i nannai i ta̱ o kuyotsongu uma a̱ ubuta̱ wi ida̱shi i ma̱riki n kuya'anka vuza ili i na yi derere, n nannai dem u ci ya'an n a̱ra̱ɗi ba.  Amma yi baci n asuvawuya adama a ili i vuza ɗa̱ a̱ a̱ɗu a̱ ɗa̱ n kusheshe ku ka̱ci ka̱ ɗa̱ koci, ka̱ta̱ i dana a na yi n ugboji ba. A̱ra̱ɗi a̱ ɗa̱ i ta̱ a ku'iwan kadanshi ka mayun.  Asuvawuya adama a ili i vuza ɗa̱ ta ɗe a̱ uta̱i a̱ Ka̱shile ba, ucigi u ka̱ci ka̱ ɗa̱ kpamu wu uta̱ a̱ ubuta̱ u Ka̱shile ba. Ili i nan lo ili ya aduniyan i ɗa, ili i Ka̱shile i ɗa ba. Kalijani ka'a kpamu ka̱ tsu tuka̱ n i ɗa.  Ubuta̱ u na ili i nam pa yi dem yi ta̱ a kucina punu vishili n ili i wuya kakau babu mapanakpanai.
 Amma ugboji u na wu uta̱i gaɗi vu Ka̱shile u ɗa wi ta̱ ciɗa. Wi ta̱ kpamu a kuciga ida̱shi i singai m ma̱ta̱na̱. U ɗa wi ta̱ m ma̱riki, ayin dem u ɗa wi ta̱ n kusheshe ku singai a̱ ubuta̱ wo otoku. U ɗa wi ta̱ kpamu tukpa n asuvayali n kuya'an ki ili i singai. U ci yotsongu n ucigi kakau ba. U ci ɗika ta̱ kpamu ili i na yi i mayun, mayun.  Aza a na i kpamu a kuzuwa ma̱ta̱na̱ i ta̱ a̱ kuca̱'a̱ icu'u i ma̱ta̱na̱, ka̱ta̱ a kya'a ili i singai.
 Yi ɗa̱i i zuwai ɗa yi o kuyongo n vishili n kanananai uteku u ɗa̱ a̱ ubuta̱ wi ida̱shi i ɗa̱? Ili i na i tsu zuwa ɗa̱ nannai i ɗaɗa kusheshe ku kavama ku na ki o kuvon punu a̱ a̱ɗu a̱ ɗa̱.  I ci ciga ta̱ ili, i ciya̱ i ɗa ba, ka̱ta̱ i gita̱ kusheshi ku na i ku unanai. Yi ta̱ a ma'iwanai adama a na aza o yoku i ta̱ n ili i na i kpa̱ɗa̱i kuciya̱, ya̱ kuciya̱ka̱ ka̱ci ka̱ ɗa̱ ili ya ba, ka̱ta̱ i ka̱na̱ vishili n kukpa̱ɗa̱ mapanakpanai adama a na yi isa ili ye ekiye ya aza a na i n i ɗa. Amma ili i na i zuwai ɗa i kpa̱ɗa̱i kuciya̱ ili i na i cigai va i ɗaɗa adama a na i folono Ka̱shile ili ya ba.  Ko feu i folono i ci ciya̱ ba, adama a na a̱ɗu a̱ ɗa̱ a ga'an ba, i ci ciga ta̱ ili i na i kuneke ɗa̱ uyo'o koci.
 A̱ɗa̱ uma a na i kpa̱ɗa̱i kutono Ka̱shile, i yeve a na i ciga baci ili ya aduniyan i nam pa, an yi o kokpo arala a̱ Ka̱shile ba?  I neke a̱ɗu a̱ ɗa̱ a̱ ubuta̱ wa akaka a Katagarda ka Ciɗa ba, ana u danai Ayinviki a̱ ni i ta̱ asuvu a̱ ɗa̱ a ɗa kpamu i ta̱ a ku'iwan ili i nan lo n utsura ka̱u.  U yotsongu tsu ta̱ uga'in u ni ka̱u. Indana ili i na Katagarda ka Ciɗa ka danai,
<<Ka̱shile ki ta̱ a tsurala n aza a ugbawansuvu,
amma u tsu yotsongu ta̱ uga'in u ni wa aza a na o goyoi ka̱ci ke le.>>
 Adama a nannai, ka̱sa̱kpa̱i Ka̱shile ko tono n a̱ɗa̱, lokoi Kalijani, wi ta̱ a kusuma u ka̱sa̱kpa̱ ɗa̱.  Yawai ɗevu n Ka̱shile ayin tutu, wi ta̱ a kuyawa ɗevu n a̱ɗa̱. Sa'i ekiye a̱ ɗa̱ adama a na a̱ɗa̱ aza a̱ unushi a ɗa, za̱'i kpamu a̱ɗu a̱ ɗa̱ adama a na a̱ɗa̱ aza a kapalaka̱shi a ɗa.  Shika̱i n kujilya adama a̱ unushi u na i ya'in, na̱mgba̱i a̱tsuma̱ fon i ka̱sa̱kpa̱ izoshi ya'an una̱mgbuka̱tsuma̱ u loko ma̱za̱nga̱ ma̱ ɗa̱.  Goyoi ka̱ci ka̱ ɗa̱ a̱ ubuta̱ u Ka̱shile, wi ta̱ a̱ kuɗengusa̱ ɗa̱.
 Uma a̱ va̱, ka̱ta̱ i dansakpanai n kagbani-gbani ba. I dansakpanai baci uteku u na toku vu ɗa̱ vi ya'in kagbani-gbani, ɗa kpamu yi a kuya'ankpanai afada. I ya'an baci nannai, yi ta̱ a kushika Wila̱ u Ka̱shile. Amma eyevafada a ɗa yi ba, vuza na u kusheshe Wila̱ u Ka̱shile u na wi derere ko u na wi u gbani-gbani. Ulinga u ɗa̱ u ɗaɗa i tono u ɗa.  Ka̱shile ka'a ka ya'in Wila̱ wa, a̱yi ɗa kpamu vuza na u kuya'anka tsu afada derere ende'en. A̱yi ɗa kpamu wi n utsura u na u kisa uma ko wu una. Yayi u nekei ɗa̱ utsura u na i ya'anka vuza ɗa̱ afada?
 Panai ili na! I tsu dana ta̱, <<Anana ko mkpa'a, ci ta̱ a kubana a̱ likuci i yoku ka̱ta̱ tsu da̱sa̱ngu ɗe ali ka̱ya̱ ke te ka̱ta̱ ci ya'an tsulaga ka̱ta̱ ci ciya̱ ikebe.>>  I tsu dana ta̱ nahannai, amma i yeve ili i na i kuciya̱ ɗa̱ mkpa'a ba, adama a na wuma u ɗa̱ wi ta̱ an egele a usana. A̱ tsu ta̱wa̱ ta̱ n usana ka̱ta̱ a laza kanna ka ya'an baci.  Ana ya dana nannai va, kucikpa i dana, <<Ka̱shile ku ushuku baci ci n wuma, tsa kuya'an ta̱ ili i nam pa ya n i nan ɗe.>>  I ci ya'an ta̱ a̱ra̱ɗi adama a na yi ta̱ n ugbawansuvu. A̱ra̱ɗi ili i kavama i ɗa.  Ciɓa a na, vuma u yeve baci ili i singai i na i ga'in u ya'an, ɗa u kpa̱ɗa̱i kuya'an i ɗa, unushi u ɗa.
 A̱ɗa̱ aza a̱ uciyi, zuwai atsuvu a̱ ɗa̱ mayin. Yi ta̱ a kuluma a̱jivu n i kapatsai n i shika̱i adama a atakaci a na i lo a̱ kuta̱wa̱.  Uciyi u ɗa̱ agifa a ɗa, kaya'an ka lya'a ta̱ ɗe a̱kumbula̱ a̱ ɗa̱.  Gogo na azanariya a̱ ɗa̱ n azurufa a̱ ɗa̱ a ya'an ta̱ matsafu. Ili yu uciyi i na yi a kulapa ma̱ka̱nga̱ n i ɗa, i ɗa i kutakuma ikyamba i ɗa̱ tsa akina. Uciyi u ɗa̱ u na i ɓolongi u ɗa u kushamgba, ka̱ta̱ u ya'an tsurala n a̱ɗa̱ a kanna ka afada, ko n nannai dem ɗa yi atakaci o kuɓolongu ili ya aduniyan a ayin o ukocishi a nam pa.  Gogo na panai ma̱shi ma aza a zamalinga aza a na i doroi, ɗa i iwain kutsupa le ikebe i na a cimbakai ɗa̱ ashina. I iwain kutsupa le gogo na ali ikebe ya feu a kuya'an yoroli n utsura n tsurala n a̱ɗa̱. Ka̱shile Mala'imili ma pana ta̱ ma̱shi m malapa mu una̱ ma aza a zamalinga a nam pa.  I yongo ta̱ a aduniyan a kuya'an a'iluwa, amma ko nannai i pana ta̱ uyo'o wi ili dem i na ka̱ɗu ke sheshei. I ɓa̱na̱ ta̱ ka̱ci ka̱ ɗa̱ mayin, ali ɗa i ya'in ikyamba an ka̱giri ka̱ ka̱ɗiva̱ ka na ka kutsai. Gogo na i foɓongu ta̱ ka̱ci ka̱ ɗa̱ adama a kanna ka na a kuna ɗa̱.  I ya'anka ta̱ uma a singai afada ɗa i nekei le unushi, ɗa yu unai le, ele feu e sheshe a̱ shilika̱ n a̱ɗa̱ a̱ ɓa̱nka̱ ka̱ci ke le ba.
 Uma a̱ va̱, remei a̱ɗu adama a ayin a atakaci adama a na i vana kubono ku Vuzagbayin. Indanai bi'i acimbi, a tsu zuwa ta̱ a̱ɗu ka̱ta̱ a vana ili i kashina i le. A̱ ciya̱ baci mini ma̱ vica̱'a̱ a̱ ci keɗe ta̱ a̱pa̱'a̱ kpamu, ali a ya'an vikya'a.  Tsu nan lo tsu ɗa kpamu i kureme a̱ɗu. Shamgbai n utsura adama a na megeshe ma buwa ba, Vuzagbayin wi ta̱ lo a̱ kuta̱wa̱.  Aza a̱ va̱, ka̱ta̱ i ya'ankpanai mololo ba. I ya'an baci mololo n Ka̱shile wi ta̱ a kuya'anka ɗa̱ afada. Indanai mayin Keyevikafada ka gbayin ki ta̱ lo a̱ kuta̱wa̱, a̱yi ɗa lo kashani a̱ utsutsu.
 Aza a̱ va̱, indanai bi'i eneki, aza a na a ya'in kadanshi ka̱ Ka̱shile n utsura u kula ku ni, ele agisana a aza a atakaci a ɗa.  Ci neke ta̱ tsugbayin ka̱u a̱ ubuta̱ wa aza a na e remei a̱ɗu a ayin a atakaci. Ayuba wi ta̱ a̱ ka̱tsuma̱ ka agisana adama a na u reme ta̱ ka̱ɗu n ili i na a ya'ankai ni. A̱ ubuta̱ u ni ci cinai uteku u na Ka̱shile ke sheshei ɗa o kukotsoso ɗa u ya'ankai ni ili i singai. Adama a na Ka̱shile ki ta̱ n asuvayali n kasingai.
 Aza a̱ va̱, u la'a ta̱ n kuga'an vuma u kpa̱ɗa̱ kukucina n gaɗi ko n iɗika ko n ili i yoku kau. Ili i na va kuya'an i ɗaɗa dana <<E>> ko <<A̱'a̱>> koci, ta lo va nusa ka̱ta̱ a ya'anka wu afada adama a akucina a na vi ya'in.
 Vuza yoku wi ta̱ punu a̱ ka̱tsuma̱ ka̱ ɗa̱ n kadama? Vuma vu nan lo u gbagbala kuya'an avasa. Vuza yoku wi ta̱ lo m ma̱za̱nga̱? Vuma vu nan lo u ya'an ishipa i kucikpa Ka̱shile.  Vuza yoku wi ta̱ lo a̱ ka̱tsuma̱ ka̱ ɗa̱ nu mɓa̱la̱? Vuma vu nan lo u ɗeke nkoshi m gba̱ra̱-gba̱ra̱ n Kutoni a ya'anka yi avasa, ka̱ta̱ a sukumaka yi m mani'in, a̱ ka̱tsuma̱ ka kula ku Vuzagbayin Yesu.  Nkoshi m gba̱ra̱-gba̱ra̱ a ya'an kavasa ka uneki u ka̱ɗu, kavasa ka nan lo ka ki ta̱ o kupotsokpo yi. Ka̱shile ki ta̱ a̱ kuɗengusa̱ yi. Vuza vu mɓa̱la̱ va u ya'an baci kpamu unushi, Ka̱shile ki ta̱ kpamu a kucinukpaka yi n u ɗa.  Adama a nannai, shika̱i unushi u ɗa̱ a̱ ubuta̱ wo otoku a̱ ɗa̱, ka̱ta̱ i ya'an kavasa adama a na Ka̱shile ko potsokpo ɗa̱. Kavasa ka vuma vu na Ka̱shile ka tsu pana uyo'o u ni ka ki ta̱ n utsura ka̱u ka tsu matsa ta̱ kpamu ili i singai.
 Iliya vuma vu ɗa tsu tsu. U ya'an ta̱ kavasa n utsura ɗa u danai ka̱ta̱ Ka̱shile ko yo'o ba, ɗa ta na Ka̱shile ka panakai ni u kpa̱ɗa̱i kuyo'o ali a̱ya̱ a tatsu n kagimi.  Ɗa u doku u ya'in kavasa, ɗa Ka̱shile ko yo'i, ɗa iɗika i matsai ilikulya'a.
 Aza a̱ va̱, vuma vi yoku a̱ ka̱tsuma̱ ka̱ ɗa̱ u ka̱sa̱kpa̱ baci Kutoni, vuza yoku u bonoko yi a uye.  Ciɓa mayin, vuza na baci u bonokoi vuza vu unushi a kubana a̱ ubuta̱ u Kutoni, vuza nam pa wi ta̱ a kisa yi a̱ ubuta̱ wu ukpa̱. Adama a nannai Ka̱shile ki ta̱ a kucinukpa n unushi n a̱bunda̱i.